Shymkentte neke túni áıelin óltirgen er adam 9 jylǵa sottaldy
Shymkent qalasynyń qylmystyq ister jónindegi aýdanaralyq sotynda ótken jyldyń maýsym aıynda bolǵan qylmystyq is qaraldy. 38 jastaǵy turǵyn Qylmystyq kodekstiń 106-baby 3-bóligimen kúdikti retinde tanylyp, sotqa deıingi tergep-tekserý amaldary júrgizilgen bolatyn.
Sot sheshimimen kúdiktige 9 jylǵa bas bostandyǵynan aıyrý jazasy taǵaıyndaldy. Sottalýshy jazasyn qylmystyq atqarý júıesiniń qaýipsizdigi ortasha mekemesinde óteıtin bolady.
«Shymkent qalasynyń D.Qonaev gúlzary boıyndaǵy úıdiń páterinde sottalýshy jábirlenýshiniń jaǵy men oń jaq ıegi tusynan judyryǵymen uryp, qasaqana aýyr dárejedegi dene jaraqatyn salǵan. Saldarynan jábirlenýshiniń ólimine ákep soqqan. Sottalýshynyń qylmys jasaýdaǵy kinási sotqa deıingi tergep-tekserý barysynda jınaqtalǵan dáleldemelermen rastalady. Sot úkimi zańdy kúshine engen joq», - delingen Shymkent qalasynyń qylmystyq ister jónindegi aýdanaralyq sotynyń baspasóz qyzmeti taratqan aqparatta.