Shymkentte Naýryzdy toılaý bastalyp ketti
Shymkentte Ulystyń uly kúni – Naýryz merekesine arnalǵan is-sharalar bastaldy. Búgin qalada ótken Qoshqar ata seıilinde Shymkenttik turǵyn 45 kelilik qoshqardy 47 ret kóterdi. Al, Báıdibek aýdany Terekti aýylynan kelgen Meıirhan Rysdáýletov 105 kelilik qoshqardy 21 ret kóterdi.
Kóktem merekesinde shymkenttik jigitter dóńke jarýdan da jarysty. Al, aq jaýlyqty ájeler qol dıirmen tartyp, keli túıdi. Tabaǵa nan pisirdi. Kelinder bolsa, samaýryn qoıyp, palaý basty.
Merekelik is sharaǵa kelýshiler teatr ártisteriniń qoıylymdaryn tamashalady. Saz balshyqtan qumyra jasaǵan qolónershilerdiń ónerin kórdi. Ustalardyń temir men aǵashtan jasaǵan buıymdarymen tanysty.
Shymkent qala ákiminiń birinshi orynbasary Shyńǵys Muqan kópshilikti Naýryz merekesimen quttyqtap, sábılerdiń tusaýyn kesti.
Kóktem merekesinde kópshilikke Naýryz kóje taratyldy.
Aıta keteıik, bıyl Shymkentte naýryznama dástúri zamanaýı úlgide jańartylyp, toǵyz kún túrli ataýmen merekelenedi. Ár kún ózindik sıpaty, ózindik ereksheliktermen uıymdastyrylmaq. Іs-sharalar barysy «Kórisý kúni», «Jaılaý kúni», «Shejire kúni», «Tarıhqa taǵzym kúni», «Igi ister», «Shymyrlyq pen sheberlik», «Zııatkerlik kúni» bolyp jalǵaspaq. Sondaı-aq, «Ulttyq taǵamdar», «Nauryz Fashion Day» jáne «Gastronom Fest» festıvali uıymdastyrylady. 22 naýryzda «Ulystyń uly kúni Naýryz», «Naýryz Shymqalada» atty is-sharalar ótedi dep josparlanyp otyr.
Ataýly kúnder 23 naýryzda «Joralǵy kúnimen» aıaqtalady.