Shymkentte memlekettik qyzmetter jármeńkesi ótti

ShYMKENT. QazAqparat – Shymkenttegi Halyqqa qyzmet kórsetý ortalyǵynda memlekettik qyzmetter jármeńkesi ótti, dep habarlaıdy QazAqparat tilshisi.

QR Prezıdenti Joldaýyndaǵy tapsyrma aıasynda uıymdastyrylǵan sharada kópshilikti áleýmettik kómek alý, turǵyn úı qujatyn rásimdeý, operatsııa jasatý úshin kvota alý jáne balabaqsha kezegi sekildi elektrondy qyzmet túrleri qyzyqtyrdy.

Qala ákimdigi men Memlekettik qyzmet isteri departamenti uıymdastyrǵan jármeńkege qalalyq sáýlet jáne qala qurylysyn baqylaý, jer qatynastary, densaýlyq saqtaý, turǵyn úı jáne turǵyn úı ınspektsııasy, otbasy, balalar jáne jastar isteri jónindegi basqarmalardyń qyzmetkerleri qatysty.

Shara barysynda ákimdikke qarasty basqarmalardyń mamandary jergilikti halyqqa túrli mekemelerde kórsetiletin qyzmetter týraly túsindirip, jan-jaqty keńes berdi.Al, turǵyn úı qurylysy jınaq bankiniń ókilderi depozıt ashyp, qarjy jınaqtaý týraly aqparat berdi.

«Jármeńkege kelip, ózime qajet anyqtamalardy aldym. Endi memlekettik mekemelerge arnaıy baryp, ýaqyt joǵaltýdyń qajeti joq. Osyndaı halyqqa tıimdi sharalar jıi ótip tursa degen tilegim bar»,- deıdi jármeńkege kelgen qala turǵyny.