Shymkentte medıtsınalyq mobıldi qosymshaǵa tirkelgenderdiń qatary artty

ShYMKENT. QazAqparat - Shymkentte medıtsınalyq mobıldi qosymshaǵa tirkelgenderdiń qatary artyp keledi. Smartfondaǵy aqparattyq júıeni qoldanatyndardyń basym bóligi júkti áıelder. Bul týraly qalalyq Densaýlyq saqtaý basqarmasy basshysynyń orynbasarynyń mindetin atqarýshy Ǵalymjan Ábish málimdedi, dep habarlaıdy QazAqparat tilshisi.

Ǵalymjan Ábishtiń aıtýynsha, densaýlyq saqtaý mekemelerinde medıtsınalyq aqparattyq júıeler jumys istep jatyr. Qaladaǵy emhana men aýrýhanalar «Damý med» jáne «Jarqyn bolashaq» kompanııalarynyń mobıldik qosymshalary boıynsha elektrondy formatta halyqqa qyzmet kórsetýdi jolǵa qoıǵan. Osy qosymsha arqyly 135 myńnan asa turǵyn dárigerdiń qabyldaýyna jazylǵan. Al, 3 163 patsıent dárigerdi úıine shaqyrtqan.

Osy salaǵa jaýaptylardyń sózinshe, aptasyna 1500-ge jýyq adam mobıldi qosymshany paıdalanýǵa tirkeledi.

«Mobıldik qosymshamen jumys isteý dárigerlerge de tıimdi. Shahardaǵy barlyq medıtsınalyq mekemeler ǵalamtormen qamtylǵan. Tirkelgen emhanadaǵy IT mamandar smartfondarǵa qosymshany júktep berýde ári tolyq aqparat beredi»,- deıdi Ǵalymjan Ábish.

Aıta keteıik, emhanadaǵy dárigerler elektrondy densaýlyq kýáligi arqyly da jumys isteıdi. Keler jyldan bastap, qaladaǵy emdeý mekemeleri qaǵazsyz qyzmet kórsetýge kóshedi.

Osyǵan deıin Amerıkadaǵy qazaq dárigeriniń Shymkentte kúrdeli otalar jasaǵandyǵyn jazǵanbyz.