Shymkentte máslıhat depýtattary jumysshylarmen kezdesti

ShYMKENT. QazAqparat - Búgin Shymkent qalasynyń máslıhat depýtattary jeńil ónerkásip salasynda jumys isteıtin jumyskerlermen kezdesti. Halyq qalaýlylary Arnaıy ekonomıkalyq aımaqta ornalasqan kásiporyndardyń eńbekkerlerin aldaǵy saılaýda belsendi bolýǵa shaqyrdy, dep habarlaıdy QazAqparat tilshisi.

Kezdesý barysynda kezekten tys Prezıdent saılaýy jóninde aqparat berýge baǵyttalǵan dıalogtyq alańsha uıymdastyryldy. Elimizdegi saıası dodanyń el ómirindegi mańyzdylyǵyna toqtalǵan depýtattar, jumysshylardyń naýqan aldyndaǵy usynys-pikirlerin tyńdady. Saılaý aldaǵy áleýmettik-ekonomıkalyq maqsat-mindetter men baǵdarlamalardy oıdaǵydaı laıyqty júzege asyrýdy aıqyndap beretin, elimizdiń ishki jáne syrtqy saıasattaǵy sabaqtastyǵy men turaqtylyǵyn saqtap qalatyn qural ekeni aıtyldy.

«Eldegi qoǵamdyq-saıası kelisimdi qamtamasyz etip, alǵa nyq qadammen basyp, qarqyndy damý úshin, áleýmettik-ekonomıkalyq maqsat-mindetterdi laıyqty ári tıimdi júzege asyrý úshin bizge aıqyndyq qajet. Ony bizge aldaǵy ótetin Prezıdent saılaýy beretin bolady. Dana halqymyz «Tórteý túgel bolsa, tóbedegi keledi» demekshi, osyndaı syn saǵattarda barshańyzdy barynsha jaýapkershilikpen qaraýǵa, «bir jaǵadan bas, bir jeńnen qol shyǵarýǵa» aýyzbirshilikke shaqyramyn. Óıtkeni elimizdiń keleshegi, árbirimizdiń sheshimimizge tikeleı baılanysty»,- dedi depýtat Ramazan Tekturǵanov.

Óz kezeginde kásiporyn jumysshylary da bul bastamalarǵa qoldaý kórsetip, saıası dodaǵa túsetin úmitkerlerdiń arasynan durys tańdaý jasaıtyndyqtaryn jetkizdi.

«Biz saılaýǵa únemi baramyz. Bul joly da kandıdattardan óz tańdaýymyzdy jasaımyz. Eń bastysy, elde tynyshtyq bolsyn! Halyqtyń quqy birinshi orynǵa shyqsa, ál-aýqatymyz da jaqsarady»,- dedi operator Nurgúl Bekmuratova.

Aıta keteıik, 2018 jyly Shymkent qalasynyń jeńil ónerkásip salasynda 21,3 mlrd teńgeniń ónimi óndirilip, jyldyq ósim 25% qurady. Elimizdiń jeńil ónerkásibindegi qalanyń úlesi 23% quraıdy. Shaharda jeńil ónerkásip salasyn damytý úshin «Ońtústik» arnaıy ekonomıkalyq aımaǵy quryldy. Búginge deıin atalǵan aımaqta jalpy ınvestıtsııa quny 30 mlrd teńgeni quraıtyn 13 joba iske qosyldy. Onda 1 400-ge jýyq jańa jumys orny ashyldy. Osy aımaqta 2019-2021 jyldary jalpy quny 89 mlrd teńgeni quraıtyn 15 jobany iske asyrý josparlanýda. Sol arqyly 1 300-den asa jańa jumys orny ashylatyn bolady.

Sondaı-aq, Úkimettiń 30 qańtardaǵy keńeıtilgen otyrysynda berilgen «qarapaıym zattar ekonomıkasyn» damytý týraly tapsyrmasyn oryndaý úshin qalada «Atameken» óńirlik kásipkerler palatasymen birlese jáne «Qazaqstandyq ındýstrııa damytý ınstıtýty» AQ-nyń (QIDI) qoldaýymen Jobalyq keńse qurylyp, jumys jasaýda.

Búginde Jobalyq keńsege 73 kásiporynnan 70,3 mlrd teńgege ótinim tústi. Onyń ishinde jeńil ónerkásip salasynda 48,5 mlrd teńgege 44 joba bar.