Shymkentte latyn grafıkasyna kóshý jaıy talqylandy
Memleket basshysy Qasym-Jomart Toqaev bıylǵy Joldaýynda «Qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keldi dep esepteımin» degen bolatyn. Osy oraıda, Shymkentte tilderdi damytý men qoldanýdyń 2011-2019 jyldarǵa arnalǵan memlekettik baǵdarlamasyn iske asyrý jáne jańa álipbıge kóshý barysy talqylandy.
Shymkent qalalyq tilderdi oqytý-ádistemelik ortalyǵy uıymdastyrǵan «Til. Táýelsizdik. Taǵylym» atty ǵylymı-praktıkalyq konferentsııaǵa Sh.Shaıahmetov atyndaǵy «Til-Qazyna» ulttyq-ǵylymı praktıkalyq ortalyǵynyń ǵalymdary, zııaly qaýym ókilderi, til mamandary men janashyrlary qatysty.
«Qazirgi usynylǵan latyn qarpi naqty úlgi emes deıtinder bar. Tarıhty zerdelesek, kırıllıtsanyń ózi 10 jyl boıy ártúrli jazylyp kelgen. Sondyqtan búgingi latyn grafıkasyna negizdelgen qazaq tili álipbıiniń kem-ketikteri anyqtalyp, sosyn baryp júıelenedi», – dedi Sh.Shaıahmetov atyndaǵy «Til-Qazyna» ulttyq-ǵylymı praktıkalyq ortalyǵynyń ǵalym-hatshysy Anar Fazyljan.
Konferentsııa barysynda sot, densaýlyq salasyndaǵy termınologııa máseleleri sóz boldy.
«Salada qaralyp jatqan sot isteriniń 60 paıyzy memlekettik tilde júrgiziledi. Naǵyz qazaqy aımaq degenimizben, bul turǵyda ózekti máseleler áli de bar», - dep atap ótti Shymkent qalalyq sotynyń aqparattyq qamtamasyz etý bóliminiń basshysy Q.Dúısenbı.
Al Sh.Shaıahmetov atyndaǵy «Til-Qazyna» ulttyq-ǵylymı praktıkalyq ortalyǵynyń aqparattyq tehnologııa jáne saraptama basqarmasynyń mamany S.Qabylov bul baǵyttaǵy jumystardy jandandyrýǵa IT salasyndaǵy sarapshylar tartylyp, jumys toptary qurylyp jatqanyn jetkizdi.
Jıyn sońynda ana tilimizdiń bedelin kóterip, nasıhattaýda belsendilik tanytqan birqatar azamattarǵa Alǵys hat tabystaldy.