Shymkentte qyzmetkeri tokqa túsip qaıtys bolǵan dámhana ıesine sot úkimi shyqty
Oqıǵa ótken jyldyń shilde aıynda bolǵan. Tamaqtaný ortalyǵyndaǵy as úıdi jınap júrgen esepshiniń kómekshisin elektr togy soqqan. Sonyń saldarynan kámelet jasqa tolmaǵan jasóspirim qaıtys boldy. Qaýipsizdik tehnıkasynyń saqtalmaýy, ónerkásiptik sanıtarııa men eńbekti qorǵaýdyń ózge de qaǵıdalarynyń oryndalmaýy abaısyzda adam ólimine ákep soqty.
Shymkent qalasynyń Memlekettik eńbek ınspektsııasy jáne Kóshi-qon basqarmasynyń qyzmetkerleri júrgizgen tekserý nátıjesinde jumys berýshiniń kinási 100%, al jumysshynyń kinási 0% ekendigi anyqtalǵan.
Sot úkimimen tamaqtaný ortalyǵynyń ıesine QR QK 156-babynyń 3-bóligimen 1 jyl 5 aı 18 kún bas bostandyǵynan aıyrý jazasy taǵaıyndaldy.
«QK-niń 62-baby 3-bóliginiń 3-tarmaǵyna saı, sottalýshy 2022 jylǵy 25 qyrkúıekten 2023 jylǵy 12 maýsym aralyǵynda kúzetpen ustaýda bolǵan ýaqyty qaýipsizdigi barynsha tómen mekemede jazany óteýdiń eki kúni úshin bir kún esebimen jaza merzimine esepke jatqyzyldy. Jaza merziminiń ótelýine baılanysty ol jazany óteýden bosatyldy. Úkim zańdy kúshine engen joq», - delingen Shymkent qalasynyń qylmystyq ister jónindegi aýdanaralyq sotynyń baspasóz qyzmeti taratqan aqparatta.