Shymkentte qylmystyq isti toqtatpaq bolǵan tergeýshi men advokat jazalandy

NUR-SULTAN. QazAqparat – Shymkentte zorlaý qylmysyn toqtatpaq bolǵan sybaılas tergeýshi men advokatqa iri kólemde aıyppul salyndy. Bul týraly Sybaılas jemqorlyqqa qarsy is-qımyl agenttiginiń 1-shi departamentiniń aǵa tergeýshisi Danııar Bekaıdarov elordada ótken baspasóz máslıhatynda málim etti, dep habarlaıdy QazAqparat tilshisi.

Danııar Bekaıdarovtyń aıtýynsha, 2019 jyldyń qarasha aıynda Shymkent qalasy boıynsha sybaılas jemqorlyqqa qarsy qyzmet tergeýshi men advokatqa qatysty isti sotqa joldaǵan. Naqtyraq aıtqanda, qalalyq polıtsııa departamentiniń Abaı aýdandyq polıtsııa basqarmasynyń tergeýshisi І. Tórebaı jáne qalalyq advokattar alqasynyń advokaty N. Elgonov paraqorlyq faktileri boıynsha qylmystyq jaýapkershilikke tartylǵan.

«Tergeýshi advokat Elgonov arqyly zorlaý faktisi boıynsha qylmystyq isti toqtatqany úshin jalpy somasy 440 myń teńge para aldy degen kúdikke ilingen», - dedi Danııar Bekaıdarov.

Onyń aıtýynsha, Shymkent qalasy Abaı aýdandyq sotynyń úkimimen І. Tórebaı 13 200 000 teńge kóleminde aıyppul tóleýge mindettelip otyr. Al osy sot Elgonovty deldaldyǵy úshin kináli dep tanyp, oǵan 4 400 000 teńge aıyppul saldy.

Atalǵan adamdar memlekettik qyzmette qyzmet atqarý quqyǵynan ómir boıy aıyryldy.