Shymkentte qurylys materıaldaryn satatyn birneshe dúńgirshek órtenip ketti
Qalalyq TJD baspasóz qyzmetiniń málimetinshe, 14 mamyr kúni keshki saǵat 21:38-de Shymkent qalasy TJ departamentiniń shuǵyl kezekshilerdiń basqarý pýltine Abaı aýdany Vodopıanov kóshesindegi órt týraly habarlama kelip túsken. Oqıǵa ornyna jetken órt sóndirýshiler «Saıdyǵanı» JK saýda qatarynyń aýmaǵynda qurylys materıaldary janǵanyn anyqtady. Olar sondaı-aq 5 jeńil kólikti qaýipsiz jerge shyǵardy. Órtti sóndirýge jeke quramnyń 65 qyzmetkeri jáne 20 tehnıkasy, Apattar medıtsınasy ortalyǵy fılıalynyń 1 brıgadasy, 1 Jedel medıtsınalyq kómek brıgadasy, elektr jelisiniń avarııalyq qyzmeti jumyldyrylǵan. Órt sóndirý bólimsheleriniń naqty jáne jedel is-qımyldary órttiń jaqyn ornalasqan saýda dúńgirshekteri men qoıma úı-jaılaryna taralýyna jol berilmegen.
«Órttiń jalpy aýdany 290 sharshy metrdi quraǵan. Tilsiz jaý túngi saǵat 22:47 oqshaýlanyp, saǵat 23:23-te tolyq sóndirildi. Órttiń shyǵý sebepteri men materıaldyq zalaldyń mólsheri anyqtalýda. Qaıtys bolǵandar men zardap shekkender joq» delingen habarlamada.