Shymkentte Qurban aıt kúni 2 mal soıý beketi jumys isteıdi
Bul týraly óńirdiń bas ımamy Ahmetjan Kerimbekov málim etti, dep habarlaıdy QazAqparat HAA tilshisi.
Bas ımam sondaı-aq qurbandyq shalýdyń talaptaryna toqtaldy. Din ókiliniń sózinshe, qoı nemese eshki ispetti usaq maldy qurbandyq retinde tek bir adam ǵana shala alady. Al túıe nemese sıyr sekildi iri-qara maldardy bir kisiden jeti adamǵa deıin birigip nemese bir adam jeke óz atynan da soıýyna bolady. Qurbandyq shalýǵa birikken kisilerdiń barlyǵynyń nıeti qurbandyq qulshylyǵyn óteý maqsatynda bolýy kerek. Eger osy adamdardyń ishinen bireýi qubandyqqa tek et alý nıetimen qosylsa, barlyǵynyń da qurbandyǵy qurbandyq retinde sanalmaıdy.
«Tapqany kúndelikti qajettilikterinen artylmaıtyn, sondaı-aq saparda júrgen kisilerge qurbandyq shalý shart emes. Qadap aıtar eń negizgi shart, Qurban shalǵan ýaqytta mindetti túrde nıet etý kerek. Óıtkeni, qurbandyq maly tek qana etin paıdalaný úshin emes, eń bastysy, ol qurbandyq ǵıbadaty úshin shalynady»,-dedi Ahmetjan Kerimbekov.
Al, Arafa kúni qajylyqqa barmaǵan kisiniń oraza ustap, namaz oqýy arqyly Alladan duǵa tileýi saýap sanalady. Bas ımam sondaı-aq bıylǵy jyly aıt namazy ońtústik óńirindegi barlyq meshitterde tańǵy 7.30 bastalady dep otyr.