Shymkentte qorǵasyn zaýytynyń qaldyqtaryn óńdeıtin kásiporyn iske qosyldy

ShYMKENT. QazAqparat - Shymkent qalasyndaǵy burynǵy qorǵasyn zaýytynyń qaldyqtaryn joıý máselesi sheshimin tapty, dep habarlaıdy QazAqparat tilshisi Shymkent qalasy ákiminiń baspasóz qyzmetine silteme jasap.

Baspasóz málimetterine qaraǵanda, jetpis jyldan astam ýaqyttan beri jınalǵan óndiris qaldyqtary qorshaǵan ortaǵa zııanyn tıgizip keldi. Jyldar boıy qordalanǵan túıtkildi máseleniń ońtaıly sheshimi tabyldy.

Búgin munda óndiris qaldyqtaryn óńdep, tústi metall kontsentratyn shyǵaratyn óndiris orny iske qosyldy. Kásiporynnyń zııandy qaldyqtardy zalalsyzdandyrýda ekologııalyq mańyzy zor.

«Qalamyzdaǵy biregeı jobanyń jumysymen búgin QR Indýstrııa jáne ınfraqurylymdyq damý mınıstri B.Atamqulov pen Shymkent qalasynyń ákimi Murat Áıtenov tanysty. Memlekettik ındýstrııalyq-ınnovatsııalyq damý baǵdarlamasyna engiziletin jobany «Standard Steel KZ» JShS-gi júzege asyrdy. Munda jylyna 400 myń tonna óndiris qaldyqtary qaıta óńdeledi. Búgingi tańda jobanyń jylyna 250 myń tonna qaldyqtardy óńdeıtin birinshi jelisi jumysyn bastady. Zaýyt bıyl qarasha-jeltoqsan aılarynda tolyǵymen iske qosylǵanda 400 adam jumyspen qamtylady»,-delingen habarlamada.

Sondaı-aq onda búgingi tańda qorshaǵan ortany qorǵaý, tústi metal óndirisin damytýda qaldyqtardy qaıta óńdeýdiń mańyzy óte zor ekendigine baılanysty joba tolyǵymen iske qosylsa, ekologııany zııandy qaldyqtardan tazartýǵa zor úles qosatyny aıtylǵan.