Shymkentte kópbalaly otbasylar men jas mamandar baspanaly boldy

ShYMKENT. QazAqparat – Búgin Shymkent qalasynda Jańa jyl merekesine oraı kópbalaly analar men jumys isteıtin jastarǵa páter kiltteri tapsyryldy. Saltanatty sharaǵa qatysqan qala ákimi Erlan Aıtahanov aldaǵy ýaqytta turǵyndardy baspanamen qamtý máselesi qalaı sheshiletinin aıtyp ótti, dep habarlaıdy QazAqparat tilshisi.

Shahar basshysy jańa úıdiń ishin aralap kórip, jańadan qonystanyp jatqan otbasylarǵa syılyq tartý etti.

Aıta keteıik, Qazaqstan Respýblıkasynyń Tuńǵysh Prezıdenti - Elbasy N.Nazarbaev 2019 jyldy «Jastar jyly» dep jarııalaǵan bolatyn. Sondaı-aq, memleket basshysy Q.Toqaev kópbalaly analar men turmysy tómen otbasylardy baspanamen qamtamasyz etý máselesin alǵa qoıǵan edi. Osy oraıda, jyl qorytyndysy boıynsha shymshaharda jalpy 450 kópbalaly ana men 904 jasty baspanamen qamtamasyz etý kózdelip otyr.

Bıýdjet esebinen osy jyly 1554 páterli 27 kópqabatty turǵyn úıdi paıdalanýǵa berý josparlanǵan. Onyń ishinde 656 páterli 11 nesıelik turǵyn úı, 898 páterli 16 arendalyq turǵyn úı.ler bolyp tabylady.

Al, ákimshilik iskerlik ortalyǵynda 590 páterli 10 kópqabatty arendalyq turǵyn úıdiń qurylysy júrgizilgen.

Oǵan qosymsha, «Shymkent Sıtı» qalashyǵynda 558 páterli 9 kópqabatty arendalyq turǵyn úı jáne Ákimshilik iskerlik ortalyǵynda 336 páterli 6 kópqabatty turǵyn úı, qalanyń Eńbekshi jáne Abaı aýdandarynda 70 páterli 2 kópqabatty turǵyn úı paıdalanýǵa beriledi dep kútilýde.

Qalalyq ákimdik tarapynan kópbalaly analar men jaǵdaıy tómen otbasylardy baspanamen qamtý úshin satyp alý quqyǵynsyz jalǵa beriletin turǵyn úımen qamtý jumysy júıeli júzege asyrylýda.

Elbasy men Memleket basshysynyń saıasatyn iske asyrý maqsatynda bul jumystar aldaǵy ýaqytta da qarqyndy túrde jalǵasyn tabady.