Shymkentte kólik júrgizýshisiniń kinásinen 600-den astam úı gazsyz qaldy
12:53, 30 Jeltoqsan 2022
ShYMKENT. QazAqparat - Shymkentte jeńil kólik júrgizýshisiniń kinásinen 600-den astam úı gazsyz qaldy, dep habarlaıdy QazAqparat.
«Opel Vectra» kóliginiń júrgizýshisi rýlge ıe bola almaı, joǵary qysymdy gaz qubyryna soǵylǵan. Saldarynan 600-den astam úı kógildir otynsyz qaldy.
«Oqıǵa búgin tańǵy saǵat 05:31 shamasynda Qursaı shaǵyn aýdanynda bolǵan. Júrgizýshige qatysty tıisti zańnyń «Kólik quraldary júrgizýshileriniń jol júrý erejelerin buzýy, kólik quraldarynyń nemese ózge de múliktiń búlinýi» baby boıynsha ákimshilik hattama toltyrdy. Júrgizýshi gaz kompanııasyna keltirilgen materıaldyq shyǵyndy óteıtin bolady» delingen polıtsııa habarlamasynda.
Qazir qubyrlardy jóndeý men qalpyna keltirý jumystary júrgizilýde.