Shymkentte qaıyrshynyń keıpine engen alaıaqtar 4,5 mln teńgeniń altynyn urlap ketken

ShYMKENT. QazAqparat – Shymkenttik eki turǵyn alaıaqtyq qurbany boldy. Eki oqıǵada da qaıyrshynyń keıpine engen alaıaqtar baǵaly zattardy qoldy etken, dep habarlaıdy QazAqparat tilshisi.

Esikti ashqan turǵyndarǵa úılerinde dýa bar ekenin aıtqan kúdiktiler tez arada úıdi tylsym kúshten tazartý kerektigin jetkizgen.

Aıtqanyna senbegenderdi qaıǵy-qasiret keletinin aıtyp qorqytypty.

Al, kelisim bergenderine altyn, kúmis sekildi baǵaly zattaryn aldyryp, tazartatynyn jetkizgen.

Sodan zergerlik zattardy qolyna ustaǵan kúıi úıdi aınala júrip, biraz ýaqyttan soń izin sýytqan.

Jalpy kelgen shyǵyn kólemi - 4,5 mln teńge.

«Atalǵan is boıynsha jedel-izdestirý sharalaryn júrgizgen tártip saqshylary beınebaqylaý kamerasy arqyly kúdiktiler otyrǵan taksı júrgizýshisin tapty. Sol arqyly kúdiktini turǵylyqty jerinen ustady» delingen Shymkent qalasy polıtsııa departamentiniń baspasóz qyzmeti taratqan habarlamada.

Qazirgi tańda atalǵan jaıt boıynsha «alaıaqtyq» babymen sotqa deıingi tergeý amaldary júrgizilip jatyr.