Shymkentte Kaspıı bankti tonaǵan adam 12 jylǵa bas bostandyǵynan aıyryldy
Sot otyrysynda málim bolǵandaı, aıyptalýshy 2013-2016 jyldar aralyǵynda Kaspıı bankte ınkassator- jınaýshy bolyp jumys istegen. Al, 2016 jyldyń shilde aıynda óz erkimen qyzmetinen ketipti. Osy jyldyń qyrkúıek aıynda Almaty qalasyndaǵy ózi jumys istegen bank fılıalyna qaraqshylyq shabýyl jasaǵan. Óıtkeni bankke aqsha qalaı jáne qaı kezde keletinin qaraqshy jaqsy bilgen. Artynsha osy bankten eki ret nesıe alady. Dál osyndaı qylmysty ol 2017 jyly Shymkentte jasaǵan. Qaraqshylyqqa shyqpas buryn ol shym shaharda bir jyl páter jaldap turyp, daıyndalǵan. Jospar qurǵan. Bankti tonaǵan soń, eki nesıesin de jaýyp tastapty. Alaıda artynsha ol tártip saqshylaryna ustalyp, jasaǵan qylmystaryn moıyndady. Sot úkimimen Leonıd Kolomeıtsev jazasyn 12 jyl boıy asa qatań tártiptegi túrmede óteıtin boldy. Múlki de tárkilenedi.
Esterińizge sala keteıik, aıyptalýshy 2017 jyldyń 13 qazanynda Shymkenttegi Kaspıı bank bólimsheleriniń birin tonap ketken bolatyn. Qylmys barysy baqylaý kamerasyna túsip qalǵan. Oǵan sáıkes, qaraqshy bank ǵımaratynyń negizgi kireberis esiginen erkin kirgen. Betin aq matamen tumshalap alǵan ol, «jarylǵysh paketke» uqsas zatty edenge laqtyryp, atalǵan zat tútindeı bastaǵan kezde bank qyzmetkerlerin baltamen qorqytqan. Keıin kassa bólimine enip, tartpadan býylǵan aqshalardy alyp, sómkesine sala bastaıdy. Sómkesin aqshaǵa toltyrǵannan keıin, negizgi kireberis esikten emin-erkin syrtqa shyǵyp ketedi.
Tekserý barysynda kúdiktiniń bankten 16 mıllıon teńge, 23 myń AQSh dollaryn jáne 8,5 myń reseı rýblin alyp ketkeni belgili boldy. Artynsha polıtsııanyń qolyna túsken seziktiniń turǵylyqty meken jaıynan urlanǵan aqshanyń biraz bóligi, sómke, qolǵap jáne jasalǵan qylmysqa onyń qatysy baryn dáleldeıtin ózge de zattaı aıǵaqtar tabyldy.
Tergeý kezinde kúdiktiniń 2016 jyldyń 2 qyrkúıeginde Kaspıı banktiń Almatydaǵy bólimshesin tonamaq bolǵandyǵy anyqtaldy.