Shymkentte kásipkerlerge qyzmet kórsetetin ortalyq ashyldy

ShYMKENT. QazAqparat - Shymkentte jańadan kásipkerlerge qyzmet kórsetýdiń biryńǵaı ortalyǵy ashyldy. «Bızneske arnalǵan úkimettiń» ortalyǵynyń ashylýyna qalalyq Kásipkerler palatasy men «SHYMKENT» ÁKK» AQ birlesip atsalysty, dep habarlaıdy QazAqparat tilshisi.

Jańa ortalyq qyzmetiniń tanystyrylymyna «Atameken» QR UKP Basqarma tóraǵasynyń orynbasary Oljas Ordabaev pen Shymkent qalasy ákiminiń orynbasary Danat Jýmın, Kásipkerler palatasynyń dırektory Nurlan Qabyshtaev pen «SHYMKENT» ÁKK» AQ basqarma tóraǵasy Rashıd Aıýpov, sondaı-aq, memlekettik mekemeler men qarjy ınstıtýttarynyń, ınvestıtsııalyq kompanııalardyń jáne qala kásipkerleriniń ókilderi qatysty.

«Bızneske arnalǵan úkimet» jobasy «bir tereze» qaǵıdaty boıynsha bıznesti qoldaý men damytýǵa yqpal etpek. Munda qalalyq Kásipkerler palatasynyń menedjerleri men «SHYMKENT» ÁKK» AQ, «Damý» qory AQ men «Azamattarǵa arnalǵan úkimet» memlekettik korporatsııasy» KE AQ (HQKO) jáne memlekettik organdardyń qyzmetkerleri qyzmet kórsetedi.

«Ortalyqta kásipkerlerge barlyq qajetti keńester men óz jobalaryn súıemeldeýde qoldaý kórsetiledi. Eń bastysy - bári ashyq jáne qoljetimdi. Palatanyń, memlekettik organdardyń, qarjy uıymdarynyń ókilderi qyzmetterdiń tolyq spektrin kórsetedi.Endi bızneske memlekettik mekemelerdiń tabaldyryǵyn tozdyrýdyń qajeti joq. Usynylatyn qyzmetter onlaın rejimde de qoljetimdi», - deıdi «Atameken» QR UKP Basqarma tóraǵasynyń orynbasary Oljas Ordabaev.

Ortalyqty tanystyrý barysynda qalalyq Kásipkerler palatasynyń dırektory Nurlan Qabyshtaev «Bızneske arnalǵan Úkimettiń» qoljetimdi 6 mamandandyrylǵan qyzmet aımaǵynyń fýnktsııalaryn egjeı-tegjeıli túsindirdi.

«Ortalyqta qalalyq Kásipkerlik jáne ındýstrııalyq-ınnovatsııalyq damý, Týrızm jáne syrtqy baılanystar, Jer qatynastary, Aýyl sharýashylyǵy jáne veterınarııa, Sáýlet jáne qala qurylysy basqarmalary men MSQB ókilderi qyzmetk kórsetedi. Kásipkerlerge shyǵarylatyn taýardy jyljytýda kómek kórsetý, bıznes úshin marketıng qyzmeti, býhgalterlik súıemeldeý, memlekettik satyp alý boıynsha keńes berý, CT KZ sertıfıkattaryn berý usynylady.

Qarjylandyrý aımaǵynda - qarjy uıymdary men damý ınstıtýttarynyń, ÓKP KQKO jobalaryn súıemeldeý boıynsha bıznesti servıstik qoldaýdyń menedjer-konsýltanttary, EDB ókilderi, «DAMÝ» Qorynyń qyzmetkerleri kórsetetin qyzmetteri usynylǵan», - deıdi Nurlan Qabyshtaev.

Aıta keteıik, «Atameken» UKP «Bızneske arnalǵan úkimet» jobasyn elimizdiń barlyq aımaqtarynda mýltıplıkatsııalaýdy bastady. Búginde mundaı ortalyqtar Almaty oblysy men Mańǵystaýda jumys jasap jatyr.