Shymkentte kásipkerlerdiń kómegimen 30 mektep salynady

ShYMKENT. QazAqparat - Shymkentte jyl saıyn 24 myńǵa jýyq oqýshy birinshi synypqa qabyldanady. Sondyqtan alyp shaharda árbir oqý jylynda 20 myń balaǵa arnalǵan bilim uıalary salynýǵa tıis. Bul máseleler búgin qalalyq máslıhattyń kezekten tys 37 sessııasynda sóz boldy, dep habarlaıdy QazAqparat tilshisi.

Mektep tapshylyǵy máselesin qaraǵan sessııada qala basshylyǵy ár jyly 15-ke jýyq bilim uıasy salynatynyn atap ótti. Óıtkeni, bilim oshaqtaryn der kezinde kóbeıtpese, úsh aýysymdy oqý júıesi jalǵasa bermek.

 «Úsh aýysymdy bilimniń máselesin sheshý úshin jańa mektepter salý kerek. Qazir 12 bilim uıasynyń jobalyq smetalyq qujaty daıyn. Oǵan qarjyny respýblıkadan suratyp otyrmyz. Ol másele de sheshimin taýyp jatyr. Sol 12 mekteptiń 10-na respýblıkadan qarjy bólinse, ekeýine qala qazynasynan aqsha qarastyrylady. Sonymen qatar, jeke kásipkerlermen taǵy 30 mektep salýdy josparlap otyrmyz. Osynda otyrǵan depýtattardyń arasynda kásipkerler bar, men sizderdi soǵan atsalysýǵa shaqyramyn»,- dedi sessııada qala ákimi Ǵabıdolla Ábdirahymov.