Shymkentte kásipkerler 12 balaly otbasyǵa páter syılady
Buǵan deıin páter jaldap kúneltip kelgen januıaǵa jańa baspana kútpegen tosynsyı boldy. Aıta keteıik, Muhtar Berdiqulov pen jubaıy Gúlnaranyń 7 balasy bar. Olar 2014 jyly jol apatynan kóz jumǵan týystarynyń 5 balasyn qamqorlyqqa aldy. Otaǵasy - jeke kompanııada kúzetshi bolyp jumys istese, kelinshegi Gúlnar úı sharýasynda. Ul-qyzdary kolledjer men mektepterde bilim alady.
Úsh aı buryn bul otbasynyń turmystyq jaǵdaıynan habardar bolǵan qalalyq kásipkerler palatasy óńirlik keńesiniń músheleri olarǵa baspana alyp berýge qarajat jınaı bastaǵan. Osylaısha «Meniń atamekenim» qoǵamdyq qoryna 8,5 mln teńge jınalady. Qomaqty qarajatqa úsh bólmeli páter satyp alynyp, onda jóndeý jumystaryn júrgizildi.
Al, «Bal tekstıl» kilem fabrıkasy otbasyna kilem syılady. «Azala tekstıl» kompanııasy tósek-oryn jabdyǵymen qamtamasyz etti. Іsker áıelder keńesiniń músheleri balalar kıimin, turmystyq tehnıka men otbasy úshin ydys-aıaq satyp alyp berdi. Páter kiltin saltanatty tapsyrý kezinde kásipkerler isker azamattardy qaıyrymdy bolýǵa shaqyrdy.
«Qazir kásipkerler qıyn kezeńderdi bastan keshirip jatyr. Tótenshe jaǵdaı men karantınge baılanysty olardyń kópshiligi jumysyn toqtatty. Biraq eń bastysy, mundaı jaǵdaıda da kásipkerler áleýmettik jaýapkershilikti sezinip, áleýmettik álsiz otbasylarǵa qamqor bolýy kerek. Jalpy, pandemııa bastalǵaly beri óńirlik keńestiń músheleri shymkenttikterge 100 mıllıon teńge kóleminde kómek kórsetti. Muqtaj jandarǵa aqshalaı qolǵabys etip, emdeý oryndaryna epıdemııaǵa qarsy preparattar men medıtsınalyq qorǵanys kıimderin jetkizip berdi. Betperde men azyq-túlik ónimderimen kómek berdi», - dep atap ótti Shymkent qalasy kásipkerler palatasy dırektorynyń orynbasary Oljas Janseıitov.