Shymkentte qarjy pıramıdasynyń basshylary tergelip jatyr

ASTANA. QazAqparat – Qarjylyq monıtorıng agenttiginiń Shymkent qalasy boıynsha departamenti qarjy pıramıdasyna basshylyq jasady degen kúdikpen «PK Asar Baspana» kompanııasynyń basshylaryna qatysty sotqa deıingi tergeý júrgizip jatyr, dep habarlaıdy QazAqparat.

Agenttiktiń málimetinshe, atalǵan kompanııa jeke tulǵalardyń aqshasyn kásipkerlik qyzmetke paıdalanbaı, qatysýshylar arasynda qaıta bólgen. Zalal somasy 700 mln teńgeden asady. Qazir sotqa deıingi tergeý jalǵasyp jatyr.

QR QPK-niń 201-babyna sáıkes ózge aqparat jarııa etýge jatpaıdy.

«Eger siz jáne sizdiń jaqyndaryńyz atalǵan qarjy pıramıdasynyń qyzmetine tap bolsa, turǵylyqty jerińiz boıynsha Ekonomıkalyq tergep-tekserý departamentine habarlasýyńyzdy suraımyz. Azamattardy qyraǵy bolýǵa jáne óz jınaqtaryn kúmándi qarjy uıymdaryna salmaýǵa shaqyramyz», - dedi Qarjylyq monıtorıng agenttiginen.

QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.