Shymkentte fontanǵa shomylǵan 10 jasar bala kóz jumdy

ShYMKENT. QazAqparat - Shymkentte sýburqaqta shomylǵan 10 jasar bala mert boldy, dep habarlaıdy QazAqparat tilshisi.

Qaıǵyly oqıǵa keshe keshkisin boldy. N.Nazarbaev dańǵylynda ornalasqan sýburqaqqa túsken 10 jastaǵy jetkinshek sýǵa batyp ketken. Bul týraly saǵat 19:30 shamasynda Tótenshe jaǵdaılar departamentiniń daǵdarys jaǵdaılardy basqarý basqarmasyna habarlama túsken.

«Bala ata-anasynyń qadaǵalaýynsyz júrgen. Qazir Polıtsııa departamenti sot-medıtsınalyq saraptama taǵaıyndady», - delingen Shymkent qalasy TJD qoǵammen baılanys toby taratqan aqparatta.

Jalpy Shymkent qalasy aýmaǵynda sýda jappaı demalý, týrızm jáne sportpen shuǵyldaný úshin 5 resmı oryn belgilengen. Onyń ishinde úsheýine shomylýǵa ruqsat etilgen. Al qala aýmaǵynda jalpy 32 fontan bar. Onyń 25-i jumys istep tur.