Shymkentte esirtkini túzeý mekemesine kirgizbek bolǵan kúdikti 7 jylǵa sottaldy

ShYMKENT. QazAqparat - Shymkent qalasy Eńbekshi aýdandyq soty esirtki tasymaldaǵan kúdiktige qatysty úkim shyǵardy, dep habarlaıdy QazAqparat tilshisi.

29 jastaǵy kúdikti Shymkenttegi túzeý mekemesinde jazasyn ótep otyrǵan tanysyna esirtki zatyn jetkizbek bolǵan. Arnaıy avtokólik jaldap, mekeme qorǵanyna jaqyndaǵan sátte 3 dana domalaq pishindi japsyrmamen (skotchpen) oralǵan esirtki zatyn mekemeniń qorshaýdan asyra laqtyryp, boı tasalaǵan. Bul jaǵdaıdy der kezinde baıqaǵan túzeý mekemesiniń baqylaýshylary oqıǵa ornyna polıtsııanyń jedel-tergeý tobyn shaqyrǵan.

«Tárkilenip alynǵan zattar, saraptama nátıjesimen jalpy salmaǵy 122,6057 gramdy quraıtyn «keptirilgen marıhýana» jáne 66,7945 gramdy quraıtyn «gashısh» esirtki zattary ekendigi anyqtaldy. Jedel-izdestirý is-sharalary nátıjesinde, osy qylmysty jasaǵan Túrkistan oblysynyń turǵyny ustaldy», - delingen Shymkent qalasy polıtsııa departamentiniń baspasóz qyzmeti taratqan habarlamada.

Shymkent qalasy Eńbekshi aýdandyq sotynyń úkimimen kúdikti QK-niń 297-babynyń 2-bóliginde kózdelgen qylmystyq quqyq buzýshylyqty (iri mólsherde esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) jasaǵany úshin kináli dep tanyldy.