Shymkentte esirtki saýdalaǵan boıjetken 7 jylǵa bas bostandyǵynan aıyryldy

ShYMKENT. QazAqparat - Shymkent qalasy Ál-Farabı aýdandyq soty esirtki satýmen aınalysqan 27 jastaǵy azamatshaǵa qatysty úkim shyǵardy, dep habarlaıdy QazAqparat tilshisi.

Kúdikti sıntetıkalyq esirtki zatyn ótkizýmen aınalysqany úshin kináli dep tanyldy.

Ótken jyldyń maýsym aıynda 27 jastaǵy azamatsha «pırrolıdınovalerofenon» (α-PVP) esirtki zatyn polıetılen paketke salyp, 11 000 (on bir myń) teńgeden satyp júrgen jerinen ustalǵan bolatyn.

Bul derek boıynsha, QR QK-niń 297-baby 2-bóligi boıynsha (iri mólsherdegi esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizýge) qylmystyq is qozǵaldy. Keıinnen is sotqa joldanyp, onyń barysynda atalǵan azamatshanyń kinási tolyǵymen dálelin tapty.

«Kúdikti buǵan deıin Túrkistan oblysy Saıram aýdandyq sotymen QK-niń 296-baby 4-bóligimen (asa iri mólsherdegi esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý) 3 jyl 6 aı merzimge sottalǵany eskerilip, osy úkimmen taǵaıyndalǵan jazaǵa ishinara qosý arqyly túpkilikti 7 jyl merzimge bas bostandyǵynan aıyrý jazasy taǵaıyndaldy» - delingen Shymkent qalasy polıtsııa departamentiniń baspasóz qyzmeti taratqan aqparatta.