Shymkentte esirtki kýreri bolǵan 20 jasar qyz eki jylǵa sottaldy

ShYMKENT. QazAqparat - Shymkent qalasy Abaı aýdandyq sotynda Túrkistan oblysynyń 20 jasar turǵynyna qatysty sot úkimi shyqty, dep habarlaıdy qazAqparat tilshisi.

Kúdikti Telegram jelisindegi paraqshalardyń birine «kýrer» retinde jumysqa turyp, ınternet-botpen hat jazysqan. Ol zańmen tyıym salynǵan zattardy ıemdenip, ony ózimen saqtap, tasymaldap, Shymkent qalasy aýmaǵyndaǵy jasyryn oryndarǵa qaldyryp júrgen.

Qolǵa túsken sátinde kúdiktiden jalpy 36 dana qara tústi ızolentaǵa oralǵan esirtki zattary tárkilengen. Sonymen qatar, ol jasyryn oryndarǵa tyǵyp úlgergen jerlerden taǵy 2 dana qara tústi ızolentaǵa oralǵan esirtki zattary alynǵan.

«Saraptama qorytyndysyna sáıkes, tárkilengen esirtki zaty sıntetıkalyq psıhotpropty memkatınonnyń analogy – mefedron ekendigi anyqtalyp, jalpy salmaǵy 39,831 grammdy qurady.

Sottalýshy ózine taǵylǵan aıypty tolyǵymen moıyndap, ókinetinin jetkizdi. Sottalýshynyń qylmystyq jaýaptylyǵy men jazasyn jeńildetetin mán-jaılaryn, jasaǵan qylmysynyń qoǵamdyq qaýiptiliginiń sıpaty men dárejesin, onyń jeke basynyń derekterin eskere kele, sot kúdiktige «bas bostandyǵynan aıyrý» túrindegi jazany qoldaný qajet dep sanap, ony ýaqytsha qoǵamnan oqshaýlaýǵa sheshim qabyldady» - delingen Shymkent qalasy polıtsııa departamentiniń baspasóz qyzmeti taratqan habarlamada.