Shymkentte «Erlik» murajaıynyń jańa ǵımaraty ashyldy

ShYMKENT. QazAqparat -  Shymkentte «Erlik» murajaıynyń qosymsha ǵımaratynyń ashylý saltanaty ótti. Jańadan ashylǵan eki qabatty ǵımaratta eki ekspozıtsııalyq zal, 50 oryndyq májilis zaly, eksponattardy saqtaıtyn jáne qyzmetkerler jumys isteıtin bólmeler bar, dep habarlaıdy QazAqparat tilshisi.

Ǵımarattyń aýmaǵy buryn 209,6 sharshy metr bolǵan edi. Oblys ákimdiginiń qoldaýymen aýmaǵy 285 sharshy metrlik qosymsha jańa ǵımarat salyndy. Bul murajaıda soǵys ardagerleriniń erlikterin dáripteýmen qatar zııaly qaýym ókilderimen kezdesýler jáne ózge de tarıhı-tanymdyq is-sharalar ótkiziletin bolady.  Sharaǵa qatysqan  oblys ákimi Janseıit Túımebaev pen óńir ardagerleri, zııaly qaýym ókilderi «Jeńis» saıabaǵyndaǵy Uly Otan soǵysynyń batyry, general Sabyr Raqymovtyń eskertkishine gúl shoqtaryn qoıdy. Jıynda aımaq basshysy  jurtshylyqty jańa ǵımarattyń ashylýymen quttyqtady.   

«Qoǵamdyq sanany jańǵyrtýǵa baǵyttalǵan Elbasy Nursultan Ábishuly Nazarbaevtyń «Rýhanı jańǵyrý» baǵdarlamasynyń usynylýy zaman talabyna saı mańyzdy sheshim boldy. Búgingi shara - erlikti dáripteýge, jastardyń boıyna otanshyldyq sezimdi sińirýge baǵyttalǵan. Batyrlarymyzdyń, ata-ájelerimizdiń Uly Otan soǵysy jyldaryndaǵy erlikteri men jeńisterin, tyldaǵy eńbekterin, aýǵan soǵysy ardagerleriniń erjúrektiligin nasıhattaıtyn bul mýzeıdiń mańyzy joǵary. Jastardy otanshyldyqqa tárıbeleýde bul ortalyqtyń da qosar úlesi mol», - dedi óńir basshysy.

Aıta keteıik, «Erlik» mýzeıi 2012 jyly jeltoqsan aıynda ashylyp, 2013 jyly 19 shildede oblystyq tarıhı-ólketaný mýzeıiniń qaramaǵyna ótken.

Foto avtory: Isametov Sabyrjan