Shymkentte energetıkalyq sýsyndar shyǵaratyn zaýyt ashyldy
Qala ákimdiginen málim etkendeı, «Tassaı» ındýstrıaldy aımaǵynda ornalasqan zaýyttyń ózindik quny 1 mlrd teńge. «Bolashaq-7» JShS ónimniń on tórt túri boıynsha 35 mln dana sýsyn men shyryn shyǵarýdy josparlap otyr.
Jańa nysannyń ashylýyna qatysqan qala ákimi Ǵabıdolla Ábdirahymov seriktestiktiń jumysymen tanysyp, jumysshylarmen tildesti. Aldaǵy jumystaryna sáttilik tiledi.
«Bıznestiń jol kartasy 2020» memlekettik baǵdarlamasy sheńberinde qoldaý tapqan kásiporyn zamanaýı qondyrǵylarmen jabdyqtalǵan. Shıkizatqa óńirimizdiń ónimderi qoldanylady. Aıta keteıik, jańa kásiporynda 150 jumys orny ashylyp otyr.
«Zaýyt ónimderi Shymkent qalasymen qatar Qazaqstannyń basqa óńirlerine, sondaı-aq kórshiles Qyrǵyzstan men Ózbekstan elderine eksporttalatyn bolady. Bul rette halyqaralyq dáliz joly, basqa da tasymal quraldary keńinen paıdalanylmaq», - delingen aqparatta.