Shymkentte Elbasynyń bes áleýmettik bastamasynyń iske asyrylý barysy talqylandy

ShYMKENT. QazAqparat - Shymkentte Elbasy N.Nazarbaevtyń «Bes áleýmettik bastamasyn» iske asyrý boıynsha «Nur Otan» partııasy Shymkent qalalyq fılıaly qoǵamdyq keńesiniń otyrysy ótti. Májiliske keńes músheleri men máslıhat depýtattary, atqarýshy organ basshylary men úkimettik emes uıymdardyń ókilderi qatysty, dep habarlaıdy QazAqparat tilshisi.

Elbasynyń bes áleýmettik bastamasyn iske asyrý maqsatynda Shymkent qalasy boıynsha jol kartasy ázirlenip, bekitilgen bolatyn. Osy jospardyń oryndalý barysy týraly memlekettik mekeme basshylary partııa múshelerine esep berip, usynystaryn tyńdady. QR Ulttyq banki Ońtústik aımaqtyq fılıaly dırektory Anýar Botanbekov «7-20-25» baǵdarlamasy boıynsha atqarylǵan jumystar týraly baıandady.

Anýar Botanbekovtyń aıtýynsha, búgingi tańda qala boıynsha 450 ótinish qabyldanǵan. Sonyń 239-y maquldanyp, seriktes bankter arqyly 2,5 mlrd teńgege nesıe berilgen. Degenmen bul Nur-Sultan, Almaty qalalarymen salystyrǵanda tómen kórsetkish bolyp otyr. «Qalanyń ekonomıkasy, halyqtyń ál-aýqaty ósedi. Biz áli de úlken kórsetkishterge jetemiz. Óıtkeni bul baǵdarlamanyń shekteýi joq. Sondaı-aq halyqtyń turǵyn úıge suranysy kóp. Jyldyń sońyna deıin birneshe myń sharshy metr páterler salynady. Qazirgi tańda «Nurly jer» baǵdarlamasy arqyly, jeke kásipkerlerdiń qoldaýymen jáne BI GROUP kompanııasymen de turǵyn úı kesheni salynyp jatyr. Bunyń ózi «7-20-25» baǵdarlamasy arqyly satylady», - dedi fılıal dırektory.

Qalada 10 joǵary oqý orny men 29 kolledj bar bolsa, onda 106 myńnan asa stýdent bilim alýda. Jastardyń 6614-i jataqhanamen qamtylsa, 8050 orynǵa qajettilik týyndap otyr. Jıynda úshinshi megapolıs stýdent jastarynyń jataqhanadaǵy jaǵdaıyn jaqsartý boıynsha bilim basqarmasy basshysynyń mindetin atqarýshy Aıgúl Tekebaeva baıandap, naqty mysaldar keltirdi.

«Qazirgi tańda, qalamyzda jataqhana ornynyń qajettiligin joıý boıynsha birqatar jumystar atqarylýda. Atap aıtatyn bolsaq, ákimdik tarapynan «Turan» shaǵynaýdanynan 8 ga jer ýchaskesi belgilenip, «Shymkent» áleýmettik kásipkerlik korporatsııasy AQ-nyń ınvestıtsııasy esebinen 5000 oryndyq jataqhana salý úshin jer ýchaskesi rásimdeldi. Sonymen qatar, jeke kásipkerler arqyly 200 jáne 350 oryndyq jataqhana salý úshin «Qarjy ortalyǵy» aktsıonerlik qoǵamymen kelisimshart jasaldy. Qurylys jumystary júrgizilýde», - dedi Aıgúl Tekebaev.

Májilis barysynda, sonymen qatar, shaǵyn nesıe berýdi kóbeıtý boıynsha qalalyq kásipkerlik jáne ındýstrıaldy-ınnovatsııalyq damý basqarmasy basshysynyń mindetin atqarýshy Núrken Bıgýlıev pen tutynýshylardy gazben qamtamasyz etý máselesi boıynsha energetıka jáne kommýnaldyq-sharýashylyq basqarmasynyń basshysy Nurlan Amanqulov baıandady. Partııa músheleri atqarylǵan jumystarǵa qanaǵattanarlyq degen baǵa berip, aqparattyq jumystardy kúsheıtý boıynsha usynystaryn aıtty.