Shymkentte Elbasy Joldaýyn nasıhattaıtyn aqparattyq toptar qurylatyn boldy

ShYMKENT. QazAqparat -  Qazaqstan Respýblıkasynyń Prezıdenti Nursultan Ábishuly Nazarbaevtyń halyqqa Joldaýyndaǵy baǵyttar Shymkentte júzege asyrylýda. Bul týraly búgin qalalyq ákimdik aktıviniń keńeıtilgen májilisinde aıtyldy, dep habarlaıdy QazAqparat tilshisi.

Ál Farabı aýdany ákimdiginde ótken májiliske Shymkent qalasynyń ákimi Nurlan Saýranbaev, qalalyq máslıhattyń hatshysy Nurlan Beknazarov bastaǵan qala aktıvi, shahardaǵy 4 aýdannyń ákimderi men túrli sala ardagerleri, qurylymdyq bólimderdiń qyzmetkerleri men muǵalimder, BAQ ókilderi qatysty.

Elbasynyń Qazaqstan halqyna arnaǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýyn talqylaýǵa arnalǵan qala aktıviniń otyrysynda aldymen shahar ákimi sóz aldy. Nurlan Ermekuly qalalyq ákimdik tarapynan atqarylar jospar týraly tolyq baıandady. 

«Bıylǵy Joldaýdyń ereksheligi - «Qazaqstan-2050» damý strategııasyndaǵy damyǵan otyz eldiń qataryna enýdiń alǵashqy qadamdary belgilendi. Damyǵan tehnologııa zamanynda álemniń bet-beınesi jedel ózgerýde. Keshegi qııalda júrgen arman-oılar búgin kúndelikti ómirge enýde. Elbasy kim aqylymen sanasyp, utymdy qımyldasa, jeńis sonyń qolynda bolatynyn árkez aıtyp keledi. Ol degenimiz - arqany keńge salmaı, eńbek etýde eski stereotıpti qoıyp, rýhanı jańǵyrýda, bilimdi de álem elderimen básekege qabiletti ultqa aınalýǵa umtyla bilýde dep túsinemin. Sondyqtan ár azamat Joldaýda aıtylǵan mindetterge asa mán berip,  iske asýyna óz úlesin qosýy qajet. Onyń negizinde ultymyzdyń bolashaǵy, halqymyzdyń jaǵdaıyn jaqsartý maqsaty jatyr. Qazaqstannyń qýatty elge aınalýy - árbir óńirge, onda atqarylyp jatqan irgeli isterge baılanysty ekenin Elbasy shegelep aıtty. Onyń ishinde Shymkent qalasynyń alatyn orny bólek», - dedi Nurlan Saýranbaev.

Shahar ákimi qalada qazirdiń ózinde áleýmettik-ekonomıkalyq damý aýqymy jaǵynan elimizdegi iri úsh megapolıstiń biri bolyp tabylatyn jetkizdi. Sondyqtan júktelgen mindetterdi sezine otyryp, jergilikti atqarýshy organdar atqaratyn jumystyń baǵytyn aıqyndap berdi.

Jıyn barysynda qatysýshylar Elbasy Joldaýynyń otansúıgishtik pen ultjandy qasıetterdi tárbıeleýde de mańyzdy qujat ekenin atap ótti. Ustazdar jaǵy bolsa óskeleń urpaqtyń tárbıesi damyǵan Qazaqstannyń bolashaǵy úshin asa mańyzdy ekenin jetkizdi.

 Májilisti qorytyndylaǵan qala ákimi Nurlan Saýranbaev Elbasy Joldaýyn nasıhattaý maqsatynda Shymkentte aqparattyq toptar qurylatynyn habarlady.