Shymkentte «El baqytyn terbetken - Təýelsizdik» merekelik jıyny ótti

ShYMKENT. QazAqparat – Shymkentte «16 jeltoqsan – Qazaqstan Respýblıkasynyń Táýelsizdigi kúni» merkesine oraı saltanatty jıyn ótti. Túrkistan saraıynda qala ákimi Erlan Aıtahanovtyń qatysýymen ótken jıynǵa óńirdegi zııaly qaýym ókilderi men memlekettik qyzmetkerler, barlyq salanyń mamandary men eńbek azamattary, qala turǵyndary qatysty, dep habarlaıdy QazAqparat tilshisi.

«El baqytyn terbetken - Təýelsizdik» atty merekelik jıynda qala əkimi Erlan Aıtahanov quttyqtaý sóz sóılep, Otanymyzdyń árbir azamaty úshin qasterli sanalatyn merekeniń mańyzdylyǵyna toqtalyp ótti. Barsha jurtshylyqty elimizdiń Egemendik alǵan kúnimen quttyqtap, dalamyz ben qalamyzdy birge kórkeıtken qazaqstandyqtar qýatty halyq ekenin atap ótti.

«1991 jyly 16 jeltoqsanda biz Táýelsizdigimizdi jer júzine jarııalap, kúlli álemge pash ettik. Aldymen kóne túriktiń bórili baıraǵynyń murageri – Kók Týymyzdy Birikken Ulttar Uıymynyń tórinde jelbirettik. Ánuranymyzdy álem kóginde áýeletip, Eltańbamyzdy máńgilik mórge aınaldyrdyq. Tól teńgemiz engizilip, Ata zańymyz qabyldandy. Qarýly kúshterimiz qurylyp, Shekaramyz belgilendi. Búginde biz – ana tilimizdi túletip, ata dinimizdi oraltqan aıshyqty elmiz. Biz – dalamyz ben qalamyzdy birge kórkeıtken qýatty halyqpyz. Arqa tósine Táýelsizdigimizdiń saltanatty sımvoly – Elordamyzdy ornatqan jasampaz jurtpyz», - dedi qala ákimi.

Shahar basshysy sondaı-aq, yntymaqty – uran, tatýlyqty – tý etken beıbit halqymyzdyń osy ýaqyt aralyǵynda tolaǵaı tabystarǵa jetkenin atap ótti.

«Elimizdiń Táýelsizdik alǵan jyldary jetken jetistikterine Shymkent qalasynyń da qosqan úlesi zor. 1993 jyly respýblıka boıynsha Shymkenttiń jalpy óńirlik ónimi – 29 mlrd 423 mln teńge bolsa, Təýelsizdiktiń 25 jylynda bul kórsetkish 2 trln 174 mlrd teńgege ósip otyr. Qalanyń ónerkəsip oryndary 4,9 mlrd teńgeniń ónimin óndirse, búginde bul saladaǵy jetistik 95 ese ósip, 458 mlrd teńgeden asty. 1991 jyldan beri qalamyzda 5,2 mln sharshy metr jańa turǵyn úıler paıdalanýǵa berildi. Osy atalǵannyń bári – Táýelsizdiktiń syıy. Aldymyzda jaýapty kezeń kútip tur. Bir shańyraqtyń astynda turyp jatqan barsha halqymyzdyń dostyǵy berik, birlik máńgi jasaı bersin. Árbir otbasyǵa baqyt, otanymyz – Qazaqstan Respýblıkasynyń ıgiligi jolynda tabys tileımin», – dedi Erlan Aıtahanov.

Merekelik jıynda QR Prezıdentiniń Jarlyǵyna sáıkes, memlekettik jáne qoǵamdyq qyzmette sińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin Shymkent qalasynyń 39 azamaty QR Memlekettik nagradalarymen marapattaldy. Saltanatty basqosý óner maıtalmandarynyń patrıottyq án-kúılerimen jalǵasty.