Shymkentte eks-medbıke esirtki qoıyp júrgen jerinen ustaldy

ShYMKENT. QazAqparat – Esirtki qylmysyna qarsy is-qımyl basqarmasynyń qyzmetkerleri jedel is-sharalar barysynda qala aýmaǵynda psıhotroptyq zattar qoıyp ketýmen aınalysqan boıjetkendi ustady, dep habarlaıdy QazAqparat Polisia.kz-ke silteme jasap.

«Jumysqa» shyqqan avtoledı polıtseılerdi baıqap, esirtki oramynan tezirek qutylý úshin, ony joldyń shetinde turǵan óz kóliginiń astyna laqtyryp jibergen. Jedel qyzmetkerler býmanyń ishinen bir rettik 20 doza «sıntetıka» tapty.
Ustalǵan boıjetkenniń kóliginiń salonyn tekserý kezinde taǵy bir shaǵyn oram gashısh tárkilendi. Buǵan qosa, oń jaq eden kilemshesiniń astynan qupııa oryndardy qazýǵa arnalǵan pyshaq tabyldy.

Tergeýshiler bul jaıtty QR QK-niń 297-baby (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) boıynsha SDTBT-ǵa tirkedi. Boıjetken jaqynda ǵana medıtsına salasyndaǵy qyzmetinen otstavkaǵa ketkeni belgili boldy.

«Qazir atalǵan jaıt boıynsha Eńbekshi aýdandyq polıtsııa basqarmasy sotqa deıingi tergeý amaldaryn júrgizip jatyr. Kúdikti qamaýǵa alyndy», – dedi esirtkimen kúresýshi Baýyrjan Qarbekov.

Polıtsııa qyzmetkeri esirtkini satý maqsatynda zańsyz paıdalaný bas bostandyǵynan aıyrý jazasyna ákeletinin eskertti.