Shymkentte bıshiler festıvali ótti

ShYMKENT. QazAqparat - Shymkentte Astananyń 20 jyldyǵy qarsańynda «Burań bel» bı festıvali ótti. «Qııal álemi» saıabaǵynda uıymdastyrylǵan sharaǵa úzdik óner kórsetip júrgen 22 bı toby qatysty, dep habarlaıdy QazAqparat tilshisi.

Aımaqtaǵy bı toptary arasynda tájirıbe almasýǵa yqpal etý men  áriptestik baılanysty nyǵaıtý maqsatynda uıymdastyrylǵan sharada  bı toptary tájirıbeli mamandardan dáris alyp, jańa qyrynan tanylýǵa múmkindik aldy. Arnaıy sheberlikti shyńdaý dáristerine qatysyp,  olarmen elimiz ben Qyrǵyzstannyń ataqty horeograftary jumys jasady. Sodan keıin bıshiler  «Táýelsizdik» saıabaǵynda «Rýhanı jańǵyrý»  fleshmobyn uıymdastyryp, el rýhy men rýhanı qundylyqtar jáne máńgilik el muraty túrli qımyldar arqyly nasıhattady. Oblystyq orys drama teatry ǵımaratynyń aldynan «Qııal álemi» saıabaǵyna deıin 500-den asa bıshi sherý retinde júrip ótip, sharanyń sońy bı keshine ulasty.

Bıylǵy jyly úshinshi ret uıymdastyrylǵan festıval baıqaý túrinde emes, gala-kontsert retinde ótti. Sahnada myń buralǵan bıshiler qala turǵyndaryn óz ónerlerimen tánti etti. Festıval sońynda qonaqtarǵa alǵys hattar men syı-sııapattar tabystaldy. Bı ujymdarynyń jetekshilerine de aqshalaı syılyqtar berildi.