Shymkentte benzın qymbattady

ShYMKENT. QazAqparat - Shymkenttegi janarmaı quıý stantsııalaryndaǵy baǵa ózgerdi, dep habarlaıdy QazAqparat.

AI-92 markili benzıniniń baǵasy keıbir stantsııalarda 2-3 teńgege ósti. Mysaly, «Gazpromneft», «Gelıos», «Satýjol» stantsııalarynda benzın baǵasy lıtrine 130 teńge dep qoıyldy. Al, «Sıgma», «Sınoıl» sııaqty stantsııalarda benzın quny 15 teńge qosylyp 127 teńgege deıin artty.

Baǵanyń ósýi Shymkent munaı óńdeý zaýytynyń josparly kúrdeli jóndeýge toqtaýymen baılanysty bolyp otyr, dep málimdedi «Janar-jaǵarmaı» qaýymdastyǵynyń tóraǵasy Qaıypbek Qambarov. «Eń basty sebep - zaýyttyń josparly jóndeýge toqtaýymen baılanysty. Menińshe, mundaı baǵa aldaǵy 1 aı kóleminde, ıaǵnı zaýyt iske qosylǵansha saqtalady»,-dedi Qambarov.

Ol sózinde benzın baǵasynyń qubylýy sonymen qatar Shymkentten jetkiziletin benzınniń kólemi shektelgendigimen de baılanysty ekendigin aıtty. Endi otyndy Pavlodardan tasý kerek bolyp tur. «2,5 myń tonna alyp kele jatyr. Operator benzındi kelesi joly satyp alǵanǵa deıin jetkizýi kerek. Sol sebepti ol baǵany kóterýge májbúr. Bul jaǵdaı monopolııaǵa qarsy komıtet tarapynan retteledi. Olar benzınniń qaıdan alǵanyn jáne qandaı baǵamen satylatynyn rettep otyrady»,-dedi qaýymdastyq tóraǵasy.

Sonymen qatar ol otynǵa qatysty zárýlik aımaqta joq ekendigin jetkizdi.

Esterińizge sala keteıik, «PetroQazaqstan Oıl Prodakts»JShS tehnologııalyq jelini josparly kúrdelý jóndeýden ótkizý úshin toqtatty. Ol 12 qarashada iske qosylady. Jóndeý jumystary zaýyttyń óndiris qýatyn arttyryp, kásiporynnyń ári qaraı turaqty jumysyn qamtamasyz etedi.