Shymkentte attraktsıonnan qulaǵan jigit bıletsiz, ruqsatsyz shyǵyp ketken - saıabaq dırektory

ShYMKENT. QazAqparat- Shymkentte atraktsıonnan qulaǵan jigit operator joq kezde bıletsiz, ruqsatsyz shyǵyp ketken, dep habarlaıdy QazAqparat tilshisi.

«Jaılaýkól» saıabaǵynyń dırektory Bekbolat Tóleev qaıǵyly jaǵdaıdyń qalaı bolǵanyn baıandap berdi. Dırektordyń sózinshe, bul jaǵdaı keshe saǵat 20.00 shamasynda bolǵan.

«Ramazan aıy bolǵan soń barlyǵy aýyz ashady. Bizdiń operator da dál osy kezde kassadaǵy qyzmetkerge «bılet satpańyz» dep eskertip, aýzyn ashýǵa ketken. Sol sátte álgi jigit bıikten qulaǵan. Ol jigit bizge buryn da jıi kelip turatyn. Keshe ol kassadan bılet almaı, operator kelgenshe joǵaryǵa kóterilgen. Qaýipsizdik beldikterin de ózi asyǵys taqqan. Biraq durys taqpaǵan. Bireýin taǵyp, bireýin taqpaǵanyn ázirge bilmeı turmyz. Belbeý úzilmegen, tek asyǵyp durys taqpaǵan. Onyń qasynda tanys qyzy da bolǵan eken. Biraq ol da oqıǵanyń qalaı bolǵanyn bilmeı qalǵan. Sonymen bıikke shyǵyp, túsip jatqan kezde 4-5 metr qalǵanda qulaǵan ǵoı», - dedi dırektor.

Bekbolat Tóleev sondaı-aq, 20 jastaǵy jigittiń bıikke kóterilgennen keıin ruqsat etilmegen ádister jasaǵanyn aıtady.

«Ol kóterilgennen keıin ary-beri shaıqatylǵan. Qatty shaıqatylǵany sonsha, jumsaq túshekke túspeı, syrtyna, tipti qorshaýdyń janyna qulaǵan. Etpetinen túsken soń ishki aǵzalaryna da zaqym kelgen, basy jarylǵan. Tez arada alǵashqy kómek kórsettik, jeled járdem shaqyrttyq. Túnimen aýrýhanada júrip, ol jigittiń týystaryna moraldyq jáne materıaldyq turǵyda kómek berdik. Anasy jylap júrdi. Aldaǵy ýaqytta onyń aıaqqa turyp ketýine atsalysamyz», - dedi saıabaq dırektory.

Eske salaıyq, buǵan deıin Shymkenttegi atraktsıondardyń birinan jas jigit qulap, aýyr jaǵdaıda aýrýhanaǵa túskenin habarlaǵan bolatynbyz. Qazirgi tańda dárigerler onyń jaǵdaıy aýyr ekenin aıtyp otyr.