Shymkentte atraktsıonnan qulap, mert bolǵan jasóspirimniń ólimi boıynsha qylmystyq is qozǵaldy
19:53, 29 Mamyr 2021
ShYMKENT. QazAqparat - Shymkentte atraktsıonnan qulap, mert bolǵan 17 jastaǵy jasóspirimniń ólimi boıynsha qylmystyq is qozǵaldy. Bul týraly qalalyq PD baspasóz qyzmeti jarııa etti, dep habarlaıdy QazAqparat tilshisi.
«Kámeletke tolmaǵan balanyń tehnosaıabaqta qaıtys bolý faktisi boıynsha Shymkent qalasynyń PD ál-Farabı aýdany Polıtsııa basqarmasynyń qyzmetkerlerimen QR QK 156-babynyń 3-bóligine sáıkes qylmystyq is tirkeldi. Sot-medıtsınalyq saraptama taǵaıyndaldy. Qazirgi ýaqytta sotqa deıingi tergep-tekserý amaldary júrgizilýde», delingen habarlamada.
Eske salaıyq, keshe qalanyń ortalyǵyndaǵy tehno saıabaqta 17 jastaǵy jasóspirim atraktsıonnan abaısyzda qulap ketken bolatyn. Alaıda jedel járdem qyzmeti kelgenshe jasóspirim jantásilim etti. Qazir qaıǵyly oqıǵanyń mán jaılary anyqtalyp jatyr.