Shymkentte áskerı qyzmetshi qashyqtyqqa júgirý jattyǵýynan keıin kóz jumdy
Oqıǵanyń bolǵanyn QR Ulttyq ulany «Ońtústik» óńirlik qolbasshylyǵynyń baspasóz qyzmeti rastady.
«2023 jyly 15 maýsymda Shymkent qalasyndaǵy 6506 áskerı bólimniń jaýyngerlik daıarlyq josparyna sáıkes, áskerı qyzmetshiler oıly-qyrly jerlerde qashyqtyqqa júgirý jattyǵýyn ótkizgen. Shara aıaqtalǵan soń áskerı qyzmetshi B. Baıjanov ózin nashar sezingen, oǵan dereý alǵashqy medıtsınalyq kómek kórsetildi. Ári qaraı ol Shymkent qalasynyń birinshi qalalyq klınıkalyq aýrýhanasyna jetkizilip, jansaqtaý bólimine jatqyzyldy. Ertesine saǵat 17.15 shamasynda áskerı qyzmetshi qaıtys boldy», - dep jazylǵan resmı habarlamada.
Oqıǵanyń sebebi men mán-jaıyn anyqtaý úshin qyzmettik tergeý júrip jatyr.
«Ońtústik» óńirlik qolbasshylyǵynyń jáne QR Ulttyq ulany 6506 áskerı bóliminiń qolbasshylyǵy Bekjan Baıjanovtyń týystary men jaqyndaryna kóńil aıtady. QR QІJK 201-babyna sáıkes, basqa aqparat tergeý múddesi úshin jarııalanbaıdy», - dedi óńirlik qolbasshylyq.