Shymkentte arnaıy ortalyqta qandastar 6 aı tegin turyp, qazaqsha jáne oryssha úırene alady

ShYMKENT. QazAqparat - Shymkent qalasy jumyspen qamtý jáne áleýmettik qorǵaý basqarmasynyń «Qandastardy beıimdeý jáne yqpaldastyrý ortalyǵy» kommýnaldyq memlekettik mekemesi 2008 jyldan beri qandastarǵa beıimdeý jáne yqpaldastyrý qyzmetin kórsetip keledi, dep habarlaıdy QazAqparat.

Otandastar qory taratqan málimetke qaraǵanda ortalyqtaǵy 39 bólme 170 adamǵa arnalǵan.

Munda tarıhı Otanyna oralǵan qandastarymyz 6 aı tegin turyp, tegin qyzmet túrlerin paıdalana alady.

Qandastar úshin arnaıy ashana, demalatyn bólme jáne arnaıy oqý bólmesi bar.

Qandastarǵa 6 túrli kishi kásiptik mamandyq (aspazshy, kondıter, esep jáne aýdıt, elektrık, tiginshi, gazelektrodánekerleýshi) jáne qazaq tili, orys tili, QR Zańnamasy, QR tarıhy, etno-pedagogıka (ádet-ǵuryp), halyq pedagogıkasyndaǵy otbasylyq tárbıe syndy 6 pándik dárister qalaýlary boıynsha úzdiksiz oqytylady.

«Sonymen qatar elimizdegi mádenı, merekelik is-sharalardy uıymdastyryp, atajurtyna oralǵan qandasqa tarıh qoınaýynda qalyp qoıǵan estelikterdi eske túsirýge at salysamyz. Qalamyzdaǵy «Shymkent - qaıyrymdy qala» baǵytynda jumys atqaratyn qaıyrymdylyq qorlarmen jumys jasap, áleýmettik mártebesi tómen otbasylarǵa qol ushyn sozyp, áleýetin arttyrý úshin jumys atqarylady» deıdi ortalyq mamandary.

Ortalyqqa 2008 jyldan qazirgi tańǵa deıin 781 otbasy, 2176 qandas kelip beıimdeý qyzmetterin paıdalanyp, 1046 qandas kishi kásiptik mamandyq alyp shyqty.

Ortalyqta búginde 14 otbasy 35 qandas bar. Onyń 16-sy - balalar, 19-y - eresekter.