Shymkentte «Arbat» salynady
Búgin bul týraly Óńirlik kommýnıkatsııalyq ortalyǵynda ótken baspasóz máslıhatynda oblystyq Sáýlet jáne qala qurylysy basqarmasynyń basshysy Erkin Júsipov málim etti.
Budan bólek, oblys ákiminiń bastamasymen «Ordabasy» memorıaldyq tarıhı-mádenı kesheni mańynda úsh bıdiń eskertkishi ornatylyp, «Qazyǵurt» tarıhı-etnografııalyq kesheni boı kótermek.
Basqarma basshysynyń aıtýynsha, 2017 jyldyń 9 aıynda oblystyq sáýlet jáne qala qurylysy basqarmasy 393 mln 978,3 myń teńgeni ıgergen. Bul qarjyǵa bıyl Arys qalasynyń bas josparyna ózgerister engizilip, Shymkent qalasynyń bas josparyn ózektendirý (aktýalızatsııa) jobasy daıarlanǵan. Sondaı-aq, «Qarashash ana», «Ibrahım ata», «Qyzyr Paıǵambar», «Ábdel Ázız baba», «Miráli baba» keseneleri men «Kóne Otyrar» sáýlettik jobasyn abattandyrý, jańǵyrtý maqsatynda jobalar daıarlanǵan.
«Búginde Shymkent-Qasqasý jáne Shymkent-Saıram-Tólebı aýdandaryna shyǵatyn balamaly joldyń jobasy ázirlendi. Shymkent qalasy aýmaǵyndaǵy 6 shatqalǵa eskızdik jobalary jasalyp, ınvestorlardyń esebinen iske asyrylýda. Sonymen qatar, qoldanystaǵy áýejaıdyń Qorǵanys mınıstrliginiń teńgeriminde bolýyna baılanysty jańa áýejaıdyń 3 nusqasy daıyndalyp otyr», - dedi Erkin Naýryzbaıuly.
Elbasynyń «Bolashaqqa baǵdar: rýhanı jańǵyrý» maqalasy aıasynda oblys aýmaǵynda qaıta jańǵyrtýdy talap etetin 500 eskertkish anyqtalypty. Olardyń qatarynda Shymkent qalasyndaǵy «Eski qalashyq», «Qazyǵurt» tarıhı-etnografııalyq kesheni, «Qaraýyl tóbe», «Kerýen saraı», «Qoshqar ata», «Ordabasy» memorıaldyq tarıhı-mádenı keshenderi de bar. Budan bólek, «Arystanbab» mavzoleıiniń kireberis bóligi men joldaryn abattandyrý kózdelip otyr. Sondaı aq, basqarma Shymkent qala ishilik joldaryndaǵy 12 jolaıyryǵynyń eskızdik jobasyn ázirlepti. Onyń ishinde 5 jolaıyryqtyń qurylysyn 2018 jyly iske asyrý josparlanǵan.