Shymkentte alǵash ret elektrondyq kommertsııa ortalyǵy ashylady

ShYMKENT. QazAqparat - Shymkentte elektrondyq kommertsııany damytý isi qolǵa alyndy. Jobany júzege asyrý maqsatynda Shymkent qalasynyń ákimdigi men «Qazpochta» AQ jáne «Shymkent» Áleýmettik-kásipkerlik korporatsııasy» AQ arasynda úshjaqty yntymaqtastyq memorandýmy túzildi, dep habarlaıdy QazAqparat tilshisi.

Memorandým aıasynda qalanyń alǵashqy elektrondyq kommertsııa ortalyǵy ashylady. Bul jumystar Shymkent qalasy ákimdiginiń 2019-2021 jyldarǵa arnalǵan jastar men áıelder kásipkerligin damytý jónindegi is-sharalar josparynyń negizinde atqarylyp otyr.

Bul josparda elektrondyq kommertsııany damytýǵa erekshe nazar aýdarylǵan. Mysaly, ázirlengen qoldaý sharalarynyń biri - Qazaqstan men Ózbekstan boıynsha Shymkent ınternet-dúkenderiniń taýarlaryn jetkizýge jumsalatyn shyǵyndardy óteý. Taýarlardy «Qazposhta» AQ jetkizedi. Sonymen qatar, bir tereze qaǵıdasy boıynsha bıznes úshin biryńǵaı qyzmet sýpermarketin ashý qarastyrylǵan.

Qurylǵan «Bıznes-sýpermarket» aýmaǵynda «Qazposhta» AQ-men birlesken elektrondyq kommertsııa ortalyǵy qurylady. Bul - Shymkenttegi eń alǵashqy osyndaı ortalyq. Onda e-commerce salasynda alǵashqy qadamyn jasaıtyn kásipkerler qaıtarymsyz negizde oqytýdan ótedi jáne menshikti saýda ınternet-alańdaryn ázirleýde, halyqaralyq saýdany júzege asyrýda ádistemelik kómek ala alady.

Kórsetilgen qoldaý sharalary Shymkent qalasynyń ǵana emes, búkil ońtústik óńiriniń elektrondyq kommertsııasyn damytýǵa yqpal etedi dep kútilýde.