Shymkentte Abaı eskertkishine gúl shoqtary qoıyldy

ShYMKENT. QazAqparat – Shymkentte Abaı Qunanbaıulynyń 175 jyldyǵy aıasynda qala ákiminiń birinshi orynbasary Shyńǵys Muqan men qalalyq máslıhat hatshysy Ǵanı Tashqaraev Abaı eskertkishine gúl shoqtaryn qoıdy. Sonymen qatar, olar Abaı murajaıynda bolyp, tanymdyq ekskýrsııa jasady, dep habarlaıdy QazAqparat tilshisi.

Qalada 1995 jyly uly oıshyldy óskeleń urpaqqa keńinen dáripteý maqsatynda ári Abaıdyń 150 jyldyq mereıtoıy qarsańynda saıabaq aldyna eskertkishi ornatylǵan bolatyn. Budan ózge, Shymkentte Abaı Qunanbaıulynyń esimi berilgen aýdan men dańǵyl, kitaphana, murajaı, saıabaq bar. Naqtyraq aıtqanda, 2004 jyly «Shymkent qalasynda aýdandar qurý týraly» Shymkent qalalyq máslıhatynyń sheshimi jáne ákimdik qaýlysymen Abaı aýdany quryldy. Aýmaǵy 50 myń gektarǵa jýyq jerdi alatyn aýdanda 323 myńǵa jýyq turǵyn qonystanǵan. Al, uzyndyǵy 2 shaqyrymǵa sozylatyn dańǵylǵa Abaı esimi 1990 jyly berilgen. Sondaı-aq, 1964 jyly qurylǵan qalalyq ortalyq kitaphanaǵa 2005 jyly QR Úkimetiniń qaýlysyna sáıkes Abaı esimi berilgen.

Shymkenttikterdiń súıikti demalys ornyna aınalyp úlgergen qazirgi Abaı saıabaǵy - 1967 jyly «50 let Oktıabrıa» saıabaǵy bolyp ashylǵan edi. Ol 1991 jyly 23 mamyrda qazaqtyń uly aqyny Abaıdyń esimine ózgertilgen. Onda Ekinshi dúnıejúzilik soǵys ardagerlerine arnalǵan alleıa, úlken dańq memorıaly, sýburqaq, shaǵyn sáýlet nysandary jáne merekelik is-sharalar ótkizýge arnalǵan sahna bar. Sonymen qatar, 2009 jyldyń 22 qyrkúıeginde Abaı saıabaǵynan Hakim Abaı murajaıy ashylǵan.