Shymkentte 900 oryndyq jańa mektep paıdalanýǵa berildi

ShYMKENT. QazAqparat - Búgin Shymkent qalasynyń ákimi Ǵabıdolla Ábdirahımov «Bozaryq» shaǵynaýdanyndaǵy jańadan paıdalanýǵa berilgen №57 jalpy orta mekteptiń ashylý saltanatyna qatysty, dep habarlaıdy QazAqparat.

Qala ákimi baspasóz qyzmetiniń habarlaýynsha, shahar basshysy barsha ustazdar men shákirtterdi Bilim kúnimen jáne jańa mekteptiń ashylýymen quttyqtap, izgi tilegin jetkizdi.

«Búgingi mekteptiń ashylý saltanaty Bilim kúninde ótip otyr. Jańa mektep jańasha jumys jasaıdy, naǵyz bilim ordasy bolady degen oıdamyz. Orta bilim berý deńgeıinde jańartylǵan mazmunǵa kóshý jumystary jalǵasýda. Jańa oqý jylynan bastap 3,6,8-synyptar jańartylǵan mazmundaǵy baǵdarlamamen oqı bastaıdy, 5 jáne 7-synyptarda «Ólketaný» kýrsy bıyl alǵash ret engizilip otyr»,-dedi ákim.

Zaman talabyna saı jabdyqtalyp, balalardyń tolyqqandy bilim alýyna, salaýatty ómir saltyn qalyptastyrýyna jaǵdaı jasaıtyn 900 oryndyq tıptik oqý orny 3 qabattan turady.

Eki aýysymda jumys júrgizetin mektepte 40 oqý bólmesi qarastyrylǵan. Budan basqa, jańa úlgidegi 2 mýltımedıa-lıngofon kabıneti, 4 ınformatıka kabıneti (13 oryndyq)  71  dana kompıýter jáne 2 ınteraktıvti taqtamen jabdyqtalǵan.  Sondaı-aq, 2 sheberhana  bólmesi, salaýatty ómir saltyn qalyptastyrýǵa arnalǵan sport zal men balalardyń densaýlyǵyn qadaǵalaıtyn medpýnkt qarastyrylǵan.

Aıta keteıik, bıylǵy jańa oqý jylynda Shymkent qalasyndaǵy 133 mektep 178 297 oqýshyny qabyldasa, onyń ishinde 22 myń bala birinshi synypqa qadam basty.