Shymkentte 500 jaýynger saltanatty marshpen júrip ótti

ASTANA. QazAqparat - Shymkent qalasyndaǵy «Ortalyq» saıabaqta 7 mamyr - «QR Otan qorǵaýshylar kúni» merekesine arnalǵan saltanatty shara ótti, dep habarlaıdy Ońtústik  Qazaqstan oblysy ákiminiń baspasóz qyzmeti.

Bul kúni áskerı orkestrmen 500 jaýynger «Ordabasy» alańynan «Ortalyq» saıabaqqa deıin saltanatty marshpen júrip ótip, sap túzedi.

 Merekelik jıynǵa qatysqan óńir basshysy Janseıit Túımebaev barsha Ońtústik jurty men jaýyngerlerdi Otan qorǵaýshylar kúnimen jáne Qazaqstan Respýblıkasy Qarýly kúshterine - 25 jyl tolýymen quttyqtady.
«Búginde Elbasynyń, Qazaqstan Qarýly Kúshteriniń Bas Qolbasshysy Nursultan Nazarbaevtyń strategııalyq kóregendiginiń arqasynda Qazaqstan armııasynyń jańa kelbeti, otanshyl rýhy qalyptasty. Qarýly Kúshter memleketimizdiń turaqty kepiline aınaldy. Sondyqtan bul kún - Otandy qadirleıtin, onyń tarıhyn qurmetteıtin, aıbyndy áskerimizdiń ataǵyn asqaqtatqan, memleketimizdiń qýatyn aıǵaqtaıtyn kún»,-dedi ákim.



 Munan soń, oblys ákimi eldiń qorǵanys qabiletin kúsheıtýge, ulttyq qaýipsizdikti qamtamasyz etýge, azamattardyń múddeleri men quqyqtaryn, zańdylyqty qorǵaýǵa úles qosqan 17 azamatqa Qazaqstan Respýblıkasynyń «Qurmet» ordenimen, QR memlekettik nagradasy «Erligi úshin» medalin jáne «Oblysqa sińirgen eńbegi úshin» belgisin, OQO ákiminiń gramotasy men Alys hatyn tabys etti. Sonymen qatar, 10 azamat QR Qorǵanys mınıstriniń «Minsiz qyzmet úshin» medalimen nagradtaldy.



 Kontserttik baǵdarlamamen jalǵasyn tapqan merekelik sharada «Máńgilik el tuǵyry - Qýatty Armııa» - teatrlandyrylǵan kórinisi qoıylyp, patrıottyq ánder shyrqaldy. Sonymen qatar, merekelik basqosýda ońtústikqazaqstandyqtar tikeleı translıatsııa arqyly Astana qalasynda ótken QR Qarýly Kúshteriniń 25 jyldyǵyna arnalǵan áskerı paradty tamashalady.