Shymkentte 2448 jer ýchaskesi memleketke qaıtarylady

NUR-SULTAN. QazAqparat - Shymkent qalasynyń ákimi Murat Áıtenovtiń tóraǵalyq etýimen qala aýmaǵy boıynsha jer ýchaskelerin memleket menshigine qaıtarý boıynsha jıyn ótti, dep habarlaıdy qalalyq ákimdiktiń baspasóz qyzmeti.

Onda jer qatynastary basqarmasynyń basshysy B.Áshirbekov nysandardyń qurylysyn júrgizý úshin 2448 jer ýchaskesin qaıtarý týraly qaýly shyǵarylǵanyn atap ótti.

«Atalǵan nysandarǵa aǵymdaǵy jyly 3,7 mlrd. teńge qarajat qarastyrylǵan. Memleket qajettiligi úshin ıelikten shyǵarylatyn jer ýchaskesiniń, sondaı-aq jer ýchaskesinde ornalasqan jyljymaıtyn múliktiń quny, olardyń naryqtyq quny mólsherinde aıqyndalady. Búgingi tańda alańy 17,3 gektardy quraıtyn 152 jer ýchaskesin qaıtarýǵa 1 mlrd 458 mln teńge jumsalǵan», - dedi basqarma basshysy.

Onyń aıtýynsha, aǵymdaǵy jyldyń bes aıynda turǵyn úıler qurylysy men jol qurylysyna, jańa termınal men juqpaly aýrýlar aýrýhanasyna jáne mektep pen jasyl aımaq qurý syndy 11 nysannyń qurylysy úshin memleket qajettiligine qarastyrylǵan jer ýchaskeleri tolyqtaı qaıtarylǵan.

«Josparlanǵan qurylystyń sozylýyna alyp keletin máseleniń biri — menshik ıeleriniń baǵalanǵan múliktiń qunyna kelispeıtindigi. Sondyqtan qunyn aıqyndaýda menshik ıesiniń quqyǵy qorǵalyp, naryqtaǵy qunmen ótelýi tıis. Sonymen qatar, qalada júzege asyrylyp jatqan jobalardyń mańyzdylyǵyn turǵyndarǵa durys túsindirý qajet»,-dedi M.Áıtenov.

Eske salsaq, ótken jyly 199 jer ýchaskesine 2 mlrd. 301 mln. teńge qarajat bólinip, 61,8 ga jer memleketke qaıtarylǵan.