Shymkentte 20 turǵyn jer ýchaskelerin memleketke aqysyz qaıtaryp berdi

ShYMKENT. QazAqparat - Shymkent qalasynyń ákimdigi Qoshqar ata ózeni boıyn abattandyrýǵa úles qosqan 28 azamatqa alǵys bildirdi. Bul týraly qala ákiminiń orynbasary Ǵabıt Máýlenqulov málim etti, dep habarlaıdy QazAqparat tilshisi.

Qala ákimi orynbasarynyń sózinshe, Qoshqar ata ózeniniń boıyn abattandyrý jumysynyń birinshi kezeńi boıynsha ózenniń eki jaǵalaýynan 10 metr jerdi abattandyrý josparlanǵan. Alaıda bul jumystarǵa ózen boıyndaǵy 96 jer ýchaskesi kedergi keltirgen. Onyń 20-sy - turǵyn úı, 14 - jeńil qurylys nysany, 33 - garaj bolsa, 28 ýchaskede qurylys salynbaǵan. Onyń ústine, jer ýchaskeleriniń barlyǵy jekemenshikke berilip ketken.

«Arada júrgizilgen kelissóz nátıjesinde osy jer ýchaskeleriniń ıeleri qurylys nysandaryn buzýǵa kelisim berdi. Sol úshin jer ıelerine ákimdik atynan alǵys bildiremin. Al 20 jer ýchaskesiniń ıesi óz jerlerin memleket menshigine aqysyz qaıtaryp berdi. Olardy qalanyń naǵyz patrıoty dep aıtar edim. Týǵan qalasyna jany ashıtyn, qalanyń bolashaǵyna beı-jaı qaramaıtyn azamattar osyndaı bolar», - dedi Ǵabıt Máýlenqulov.

Aıta keteıik, shahardyń ortasynan ótetin Qoshqar ata ózeni boıynda abattandyrý jumystary júrgizilip jatyr. Búginde Ordabasy alańynan Ózbek kóshesine deıingi jerde ózen boıymen júrip ótýge esh kedergi joq. Qazirgi tańda bosaǵan jerlerdi abattandyrý, kóriktendirý jumystary bastaldy.