Shymkentte 2 jasar balanyń qoly elektrlik et tartqyshqa qysylyp qaldy

Shymkentte 2 jasar balanyń qoly elektrlik et tartqyshqa qysylyp qaldy, dep habarlaıdy QazAqparat tilshisi.

Jazataıym oqıǵa keshe keshkisin boldy. Aǵa feldsher Serjan Sabdenov pen feldsher Nurǵalı Tashkenbaev jáne qutqarýshy Janbolat Omarov sábıge alǵashqy medıtsınalyq kómek kórsetti.

Dárigerler balany narkozben uıyqtatqan sátinde, shuǵyl áreket etý brıgadasy apattyq-qutqarý jabdyqtaryn qoldanyp, balanyń qolyn et tartqyshtan bosatyp aldy.

Qazirgi tańda búldirshin jansaqtaý bóliminde em qabyldap jatyr.

«103» qyzmetinen jazataıym oqıǵa týraly shaqyrý Qyzyl Ásker trassalyq medıtsınalyq-qutqarý pýnktine 15 qyrkúıekte saǵat 21:37-de kelip tústi.

«Oń qoldyń birneshe jerden synýy» dıagnozy qoıylǵan bala Abaı aýylynyń ortalyq aýdandyq aýrýhanasyna jatqyzyldy. Qurmetti ata-analar jas balalarǵa muqııat qarap, abaı bolyńyzdar!» - delingen Shymkent qalasy TJD qoǵammen baılanys toby taratqan aqparatta.