Shymkentte 14 bala ýlanǵan olımpıadany uıymdastyrýshylar qatań sógis aldy

ShYMKENT. QazAqparat - Shymkentte balalar ýlanyp qalǵan olımpıadanyń uıymdastyrýshylary jazalandy. Bul jaıynda Oqý-aǵartý vıtse-mınıstri Sholpan Karınova málim etti, dep habarlaıdy QazAqparat.

Eske sala keteıik, biz buǵan deıin Shymkentke bilim olımpıadasyna qatysýǵa kelgen 14 oqýshynyń aýrýhanada jatqanyn habarlaǵan edik.

Keshe Shymkent qalasynyń sanıtarlyq-epıdemıologııalyq baqylaý departamenti olımpıadaǵa qatysýshylar arasynda bolǵan gastroenterıt faktisi boıynsha júrgizilgen tergeýdiń aralyq qorytyndysyn jarııalady.

Oǵan sáıkes, oqýshylardyń jappaı aýyrýyna ishek taıaqshasy tobyndaǵy bakterııalar sebep bolýy múmkin. Degenmen, naqty sebepter áli anyqtalyp jatyr.

Búgingi tańda 14 oqýshy aýrýhanadan shyǵaryldy. Onyń kópshiligi mektep dırektorlary, muǵalimderi, bilim basqarmasy mamandarymen birge úılerine oraldy.

«Olımpıada erejesi boıynsha qatysýshylardyń 45 paıyzy júldeli oryndarǵa ıe bolyp, marapattalýy tıis. Aýrýhanaǵa túsken oqýshylardyń jeke nátıjesi eskerilip, altyn, kúmis jáne qola medaldarmen, Alǵys hatpen marapattaldy. Sonymen qatar, keshe Oqý-aǵartý mınıstriniń qatysýymen jıyn ótip, onda olımpıadany uıymdastyrý komıtetine qatysty tıisti sharalar qabyldandy. Júktelgen mindetterdi tıisti deńgeıde oryndamaǵany jáne jaratylystaný-matematıkalyq pánder boıynsha Shymkent qalasynda respýblıkalyq olımpıadany tıisti deńgeıde uıymdastyrmaǵany úshin orta bilim komıteti tóraǵasynyń mindetin atqarýshyǵa, orta bilim komıtetiniń mazmundyq jáne ádistemelik qamtamasyz etý bóliminiń meńgerýshisine jáne «Daryn» respýblıkalyq ǵylymı-praktıkalyq ortalyǵy dırektoryna qatań sógis túrindegi tártiptik jaza qoldanyldy» dep jazdy vıtse-mınıstr Facebook paraqshasyna.

Onyń aıtýynsha, mınıstrliktiń basty mindeti - balalardyń qaýipsizdigin qamtamasyz etý.

Osyǵan baılanysty qoǵamdyq-gýmanıtarlyq baǵyttaǵy respýblıkalyq olımpıadany jáne oqýshylarǵa arnalǵan respýblıkalyq ǵylymı jobalar baıqaýyn ótkizý formattary qaıta qarastyryldy.