Shymkentke Ómirzaq Shókeev bastaǵan respýblıkalyq aqparattyq top keldi

ShYMKENT. QazAqparat - Shymkentke QR Premer-mınıstriniń orynbasary - Aýyl sharýashylyǵy mınıstri Ómirzaq Shókeev bastaǵan respýblıkalyq aqparattyq top keldi. Elbasynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýyn túsindirý maqsatynda kelgen top músheleri qala aktıvimen kezdesti, dep habarlaıdy QazAqparat tilshisi.

Jıynda Ómirzaq Shókeev Joldaý aıasynda Úkimetke naqty tapsyrmalar berilgendigin, negizgi baǵyttar aıqyndalyp otyrǵanyn atap ótti. Aldaǵy ýaqytta sharýalar men kásipkerlerge  eksporttyq áleýetti artyryp, sanǵa emes, sapaǵa jumys isteý kerektigin jetkizdi.

«Joldaýdyń birinshi tapsyrmasy aıasynda Memleket basshysy agroónerkásiptik keshendi basym baǵyttardyń biri retinde atap ótken edi. Jáne eńbek ónimdiligi men óńdelgen ónimderdi eksporttaýdy 2,5 esege arttyrý mindetin qoıdy. Aýyl sharýashylyǵy óndiristik keshenin qoldaýdyń josparlanǵan is-sharalary úsh blokqa bólinýi múmkin: júıe, ındýstrııa jáne naqty ınvestıtsııalyq jobalar. Ónerkásip memlekettik tetikter jetildirilip, memlekettik qoldaý kólemi artady. Sondaı-aq, tıimsiz sýbsıdııalardy qysqartý josparlanyp otyr. Jalpy,  Elbasynyń ár Joldaýy - mańyzdy oqıǵa. Barlyqtaryńyzdy Elbasynyń senimin aqtaýǵa shaqyramyn», - dedi Ómirzaq Shókeev.

 Óz kezeginde qala ákimi Ǵabıdolla Ábdirahymov ta Elbasy Joldaýynda kórsetilgen mindettedi oryndaý maqsatynda birqatar jumystar atqarylyp jatqanyn aıtyp ótti. Aldaǵy ýaqytta «Shymkent» agro-ındýstrıaldy aımaǵy qurylatynyn jetkizdi. Ákimniń sózinshe, atalǵan jobada agrarlyq sektordy ekonomıkanyń jańa qozǵaýshy kúshterine aınaldyrý qajettigi eskeriledi. Oǵan 20 mlrd teńge kóleminde jeke ınvestıtsııa tartylyp, 40 kásiporyn ashý josparlanǵan. Nátıjesinde Shymkentte búkil aýyl sharýashylyǵy ónimin óńdeıtin klaster jasalyp, 2022 jyly aýyl sharýashylyǵy óniminiń kólemi 67,5 mlrd teńgege jetkizilmek.

Jıyn barysynda sala mamandary men zııaly qaýym ókilderi Joldaýdaǵy  mindetterdiń oryndaý boıynsha birlesip, ózara yntymaqtastyqta  jumys isteý qajettigin aıtty.