Shymkentke bara jatqan FlyArystan ushaǵy Almatyǵa qonýǵa májbúr boldy

ALMATY. QazAqparat – FlyArystan kompanııasynyń «Aqtaý – Shymkent» baǵytyndaǵy ushaǵy Shymkent áýejaıyndaǵy ushý-qoný jolaǵynda júrgizilip jatqan jóndeý jumysyna baılanysty Almatyǵa qonýǵa májbúr boldy. Bul týraly áýe kompanııasynyń baspasóz qyzmeti málim etti, dep habarlaıdy QazAqparat tilshisi.

Áýekompanııanyń málimetine sensek, ushaq Almatyǵa qonǵan soń 15 jolaýshy borttan shyǵýdan bas tartqan.

Osyǵan baılanysty FlyArystan ókilderi polıtsııa qyzmetkerlerin shaqyrýǵa májbúr boldy.

«Bul jaǵdaıda reıstiń keshigý sebebi áýe kompanııanyń kinásinen bolǵan joq. Áýe kompanııanyń esh qatysy joqtyǵyna qaramastan, biz KS7578 Aqtaý – Shymkent reısiniń jolaýshylaryna Almatyǵa ushyp kelgen kezde ystyq tamaq pen sýsyn berdik. Jolaýshylardy túsirý kezinde 15 jolaýshy áýe kemesinen túsýden bas tartty, osyǵan baılanysty polıtsııa shaqyrýǵa májbúr boldyq», - dep habarlady FlyArystan baspasóz qyzmeti.