Shymkent zaýytynda óńdeletin munaı kólemi jylyna 9-12 mln tonnaǵa deıin artady

ASTANA. QazAqparat – «Іri munaı-gaz jáne munaı-gaz hımııasy jobalaryn damytýdyń 2023-2027 jyldarǵa arnalǵan Keshendi josparyn bekitý týraly» Úkimet qaýlysy kópshilik talqylaýǵa shyǵaryldy, dep habarlaıdy QazAqparat tilshisi.

«2023-2027 jyldarǵa arnalǵan iri munaı-gaz jáne munaı-gaz hımııasy jobalaryn damytý jónindegi keshendi jospar bekitilsin. Energetıka mınıstrligi, Keshendi jospardyń oryndalýyna jaýapty uıymdar (kelisim boıynsha) Keshendi josparda kózdelgen is-sharalardyń ýaqtyly iske asyrylýyn qamtamasyz etsin. Jaýapty uıymdar jylyna eki ret, esepti jartyjyldyqtan keıingi 5 shildeden jáne 5 qańtardan keshiktirmeı Keshendi jospardyń oryndalý barysy týraly aqparatty Energetıka mınıstrligine usynsyn. Jospardyń oryndalýyn baqylaý jáne úılestirý Qazaqstan Respýblıkasynyń Energetıka mınıstrligine júktelsin», - delingen «Ashyq» NQA portalynda jarııalanǵan Úkimet qaýlysynyń jobasynda.

Aldaǵy 5 jyl ishinde qol jetkizý josparlanyp otyrǵan nátıjeler:

- ornyqty damýdy qamtamasyz etý, eldiń ınvestıtsııalyq tartymdylyǵyn arttyrý jáne bıznestiń ekonomıkalyq belsendiliginiń ósýi úshin qolaıly jaǵdaılar jasaý;

- el boıynsha munaı óndirý deńgeıin arttyrý;

- gaz óndirý kólemin ulǵaıtý jáne tıisinshe shıki gazdyń qosymsha kólemin qaıta óńdeý, ishki naryqtyń qajettilikterin qamtamasyz etý;

- aralas salalarda ónerkásip óndirisin damytý (qurylys, avtoónerkásip, medıtsına, turǵyn úı-kommýnaldyq sharýashylyq jáne basqalar), sondaı-aq Shymkent munaı óńdeý zaýytynyń qýatyn jylyna 6-dan 9-12 mln tonnaǵa deıin arttyrý;

- jetilgen ken oryndary jańa yntalandyrýshy salyq rejımine kóshedi.

Qujat16 sáýirge deıin kópshilik talqylaýda bolady. Keıin qol qoıý úshin Premer-Mınıstrge joldanady.