«Shymkent saıabaǵyndaǵy kólde qoltyraýyn júr»: Vıdeoǵa túsinik berildi

ShYMKENT. QazAqparat – Shymkenttegi «Jaılaýkól» saıabaǵyndaǵy kólde eshqandaı qoltyraýyn joq. Bul týraly saıabaqtyń ákimshiliginen málim etti, dep habarlaıdy QazAqparat tilshisi.

Áleýmettik jelige vıdeo júktegen turǵyn «Jaılaýkól» saıabaǵyndaǵy kólden úlken qoltyraýyn kórgendigin jetkizedi. Onyń sózinshe, bala-shaǵasymen birge katamaranmen sý ústinde serýendep júrgen kezde 2 metrge jýyq qoltyraýyn aldarynan kesip ótken.

Vıdeo avtorynyń aıtýynsha, sol jerge saıabaq ákimshisi shaqyrylǵan, biraq olar qoltyraýynnyń kólde bolýy yqtımaldyǵyn joqqa shyǵarǵan.

Jelide jarııalanǵan jazbaǵa pikir bildirýshiler ekige bólindi. Biri shyndyq dep qabyldasa, endi biri oqıǵaǵa senbeıtindikterin jetkizýde. Arasynda «Baı-baqýatty adamdar úıinde asyrap otyrǵan qoltyraýyndy baǵa almaı, kólge alyp kelip tastapty», «Zoobaqtan qoltyraýyn qashyp ketipti» degen syńaıdaǵy jazbalar da bar.

Atalǵan vıdeoǵa qatysty «Jaılaýkól» saıabaǵynyń ákimshiligine habarlasyp, mán-jaıdy bildik.

«Bul – jalǵan aqparat. Muny túsindirý úshin vıdeo avtoryn izdestirip edik, tappadyq. Quqyq qorǵaý organdaryna júgingenimiz joq. Saıabaqtaǵy kólde eshqandaı qoltyraýyn joq. Tek balyqtar ǵana bar», - delingen demalys orny ákimshiligi usynǵan aqparatta.

Sondaı-aq qala zoobaǵyna habarlasyp kórdik. Mamandar mekemeden eshqandaı qoltyraýyn qashpaǵandyǵyn, barlyǵy ornynda ekendigin málim etti.