Shymkent pen Túrkistan oblysynda jylý jelileriniń jaı-kúıi qandaı

ASTANA. QazAqparat – Indýstrııa jáne ınfraqurylymdyq damý mınıstrligi Qurylys jáne turǵyn-úı kommýnaldyq sharýashylyǵy isteri komıteti tóraǵasynyń orynbasary Ázimbek Pazylbekuly Shymkent qalasy men Túrkistan oblysyndaǵy jylý jelileri men sýmen jabdyqtaý júıeleriniń jaǵdaıyn tekserdi, dep habarlaıdy QazAqparat mınıstrliktiń baspasóz qyzmetine silteme jasap.

Máselen, Shymkent qalasynyń jylý jelileriniń uzyndyǵy 838,6 shaqyrymdy quraıdy. Olardyń tozý kórsetkishi – 37%. Jylý berý maýsymy aıaqtalǵannan keıin energııa qysymyn tekserý jumystary tıisti deńgeıde oryndaldy. Qalalyq ákimdiktiń málimetine súıensek, jylý jelilerine tehnıkalyq aýdıt júrgizilip, soǵan sáıkes tekserý nátıjeleri belgili bolǵan. Jylý berý ınfraqurylymyn qalypty deńgeıde ustaý maqsatynda 2023 jyly jergilikti jáne respýblıkalyq bıýdjetten 6,3 mlrd teńge bólindi.

Aıtalyq, respýblıkalyq bıýdjettiń esebinen 8,7 shaqyrymǵa jýyq jelilerdi jańǵyrtý josparlanǵan. Eki joba boıynsha 4,5 shaqyrymǵa sozylǵan jylý berý ınfraqurylymynyń qurylysy qolǵa alynyp, onyń 1,3 shaqyrymyn salý jumystary aıaqtaldy. Qazir uzyndyǵy 4,2 shaqyrym bolatyn magıstraldy jylý qubyryn jóndeýge baılanysty jobalaý-smetalyq qujattama ázirlenip jatyr. Bıylǵy shildeniń sońyna qaraı qajetti saraptamanyń qorytyndysy alynady dep kózdelgen.

«Tutastaı alǵanda, Shymkenttegi jóndeý jumystary ákimdiktiń udaıy baqylaýynda», - dedi jergilikti atqarýshy organ ókilderi.

Sondaı-aq QR IIDM ókili sý burý júıeleriniń jaǵdaıyn da baǵamdap shyqty.

Qazir 81 eldi mekenniń 78-i taza sýmen qamtamasyz etilgen. 3 eldi mekende (Qurbaı, Saıram, Qaınarbulaq) qurylys jumystary júrip jatyr. Ony 2023 jyldyń sońyna deıin aıaqtaý josparlanǵan. Munyń nátıjesinde 72 myńǵa jýyq adam aýyz sýdan tarshylyq kórmeıtin bolady. Shymkent qalasy boıynsha sýmen qamtýdy 98,5% jetkizý kózdelgen.

Budan keıin Qurylys jáne TKSh isteri komıteti tóraǵasynyń orynbasary Túrkistan oblysyna aıaldap, óńirde atqarylyp jatqan jumystardy baıqady. Atap aıtqanda, oblysta 34 ortalyqtandyrylǵan jylý qazandyǵy men 1 JEO jumys istep tur. Atalǵan ınfraqurylymnyń naqty tozý mólsherin anyqtaý úshin tehnıkalyq baıqaý jumystary júzege asyryldy. Óńirde kómirge degen qajettilik – 1 154 myń tonna. Qazir qatty otynnyń 121,5 myń tonnasy jetkizildi.

Budan basqa 4 sorǵylaý stansasy men 6,6 shaqyrymdyq magıstraldy jylý jelilerin jańǵyrtý úshin 2023 jyly respýblıkalyq bıýdjetten 2,1 mlrd teńge aýdaryldy.

Tekserý jumystarynyń nátıjesine sáıkes Á.Pazylbekuly barlyq jobany belgilengen ýaqytta aıaqtaý úshin qurylys barysyn turaqty baqylaýda ustaýdy tapsyrdy.