Shymkent pen Pavlodar zaýyttaryn munaımen jabdyqtaý úshin joba ázirlenýde
Aıta keterligi, búgin Senattyń Ekonomıkalyq saıasat, ınnovatsııalyq damý jáne kásipkerlik komıtetinde "Qazaqstan Úkimeti men Ózbekstan Úkimeti arasyndaǵy energetıka salasyndaǵy yntymaqtastyqtyń keıbir máseleleri týraly negizdemelik kelisimdi ratıfıkatsııalaý týraly" zań jobasy talqylanǵan bolatyn. Osy másele boıynsha negizgi baıandama jasaǵan vıtse-mınıstrdiń aıtýynsha, Ózbekstan Qazaqstannan 5 mln tonnaǵa deıin munaı alýǵa nıetti.
Osy oraıda senatorlar jylyna 5 mln tonna munaıdy Ózbekstanǵa jibersek, elimizdiń munaı óńdeý zaýyttary shıkizat tapshylyǵyna ushyramaı ma dep suraǵan edi.
"Qazirgi ýaqytta Pavlodar men Shymkent zaýyttaryn tek qana Aqtóbe men Qyzylordadan shyǵatyn munaımen jabdyqtaımyz. Ókinishke oraı ken oryndarynyń óz ómiri bar, bitedi. Qazir óndiris azaıyp ta jatyr. Máselen, Qumkóldi aıtar bolsaq, byltyrǵa qaraǵanda bıyl 1 mln tonnadan astam munaı az óndiriletin bolady. Bul máseleni sheshý úshin Keńqııaq-Atyraý qubyryn buryp, kelesi jyldan bastap Atyraýdan Keńqııaqqa deıin jylyna 4 mln-nan 6 mln-ǵa deıin munaı tasymaldaýdy josparlap otyrmyz. Bul tek osy zaýyttardy munaımen jabdyqtaý úshin jasalyp otyrǵan joba", - dedi vıtse-mınıstr.
Osy rette ol Ózbekstan Jızaqta munaı óńdeıtin zaýyt salyp, oǵan jylyna qazaqstandyq 5 mln munaı qajet bolǵan jaǵdaıda máseleni sheshý joly bar ekenin aıtty.
"Eger ózbek tarapy Jızaqta zaýyt salyp, biz oǵan arnaıy Shymkentten Jızaqqa deıin jylyna 5 mln munaı tasymaldaıtyn qubyr salatyn bolsaq, onda Atyraý-Keńqııaq qubyryn qosymsha 5 mln tonnaǵa keńeıtemiz. Árıne, birinshi másele ishki naryqty qamtamasyz etý. Odan keıin ǵana Ózbekstanǵa munaı etkizý", - dedi Bolat Aqsholaqov.